Javën e kaluar, autoritetet italiane në bashkëpunim me SPAK, goditën një organizatë kriminale me bazë në Durrës dhe në Puglia, e cila trafikonte sasi të mëdha të kokainës dhe heroinës drejt Italisë dhe vendeve të tjera të Europës.
Në krye të grupit dyshohet se qëndronte Xhevdet Troplini, i njohur si “Poja”, edhe pse ndaj tij nuk ka asnjë masë sigurie, ku duket se drejtimin e grupit vitet e fundit ia kishte lënë nipit të tij, Elvis Doçi, i njohur si “Visi i Pojës”.
Në total u lëshuan 52 masa sigurie, ku 40 prej tyre janë për shtetas shqiptarë dhe 12 të tjera për shtetas italianë, teksa disa prej tyre arritën të arratiseshin, duke përfshirë edhe kreun e grupit Elvis Doçi.
Por, një prej tyre është arrestuar së fundmi në Belgjikë. Në kuadër të operacionit të koduar “Ura” është vënë në pranga nga policia belge shtetasi Gertin Aliu, 44 vjeç.
Ai ishte shpallur në kërkim ndërkombëtar, pasi akuzohet r nga Prokuroria e Barit, për pjesëmarrje në organizatë kriminale për trafikim të lëndëve narkotike.
“Prokuroria e Barit, në vitin 2025, i ka caktuar masën e sigurisë “Arrest në burg”, për veprën penale “Trafikimi i lëndëve narkotike”, kryer në kuadrin e organizatës kriminale.” – njofton Policia.
