Kandidati për deputet i PD në qarkun e Tiranës, Grigels Muçollari në një postim në rrjetin social facebook e ka cilësuar garën e 11 majit si një sfidë të vështirë. Muçollari thotë se “nuk priste zgjedhje të lira e të ndershme, por nuk e imagjinonte që makineria e paligjshme e qeverisë për kapjen, trysninë dhe blerjen e votës të ishte aq masive sa të pamundësonte një gjykim të lirë dhe të pavarur të qytetarëve.
“Pavarësisht përpjekjeve të pafundme, takimeve me qytetarët dhe një program që pasqyronte nevojat dhe aspiratat e çdo individi, ndryshimi i shumëpritur nuk ndodhi, sepse ai u ndal para se të realizohej më 11 maj.
Në sfond qëndronte një sistem i deformuar, ku patronazhistët dhe tentakulat e qeverisë kishin marrë në dorë procesin, duke u privuar qytetarëve e drejta e tyre për të zgjedhur lirshëm. Ky fenomen bën që nga ky deformim të mos lindë asgjë e mirë për shoqërinë.
Megjithatë, falënderues jam për mbi 5,300 qytetarë të Tiranës që më besuan dhe më dhanë votën e tyre. Kjo është një përgjegjësi dhe nxitje për të vazhduar luftën për zgjedhje të lira dhe të ndershme.
Pas këtyre zgjedhjeve, si shoqëri dhe si Parti Demokratike, kemi nevojë për reflektim të thellë. Nëse vota e lirë dhe e ndershme nuk garantohen, a do ta pranojmë këtë si vend dhe si komb? Denoncimi i farsës elektorale është i domosdoshëm dhe jetik për të ardhmen.
Detyra jonë është të ofrojmë vazhdimisht zgjedhje të lira dhe të ndershme, të përmirësohemi çdo ditë, dhe të dokumentojmë me kujdes çdo shkelje që ndodh. Vetëm kështu mund të ndërtojmë një të ardhme më të mirë për Shqipërinë”, thuhet në statusin e kandidatit që humbi garën për deputet, Grigels Muçollari.
