Bardh Spahia, në një deklaratë për mediat jashtë ambienteve të SPAK, u shpreh se qytetarët shkodranë kanë dhënë një mesazh të qartë përmes votës së tyre, duke u treguar më të ndërgjegjshëm se kurrë në mbrojtje të interesit publik dhe demokracisë.
Spahia theksoi se zgjedhjet nuk u zhvilluan në kushte të barabarta, duke akuzuar mazhorancën për përdorim të shtetit dhe të të gjitha burimeve publike në funksion të tjetërsimit të vullnetit të qytetarëve.
Sipas tij, kemi të bëjmë me një ‘maskaradë elektorale’ të mirëorganizuar, që nuk lejonte qytetarët shqiptarë të shprehnin lirisht vullnetin e tyre nëpërmjet votës.
Ai shtoi se kjo situatë nuk është thjesht një problem lokal, por pasqyrë e një realiteti të dhimbshëm në të gjithë vendin, ku sipas tij, prej 12 vitesh mazhoranca ka punuar për të asgjësuar të drejtën e votës së lirë dhe për të kapur çdo institucion.
Spahia kërkoi reflektim të thellë institucional dhe politik, dhe theksoi se kjo ‘masakër elektorale’ duhet të marrë fund, duke përmendur si përgjegjës kryesor kryeministrin Edi Rama dhe qeverinë e tij.
“Unë kam përshtypjen se më mirë se askush tjetër, qytetarët shkodranë kanë qenë të ndërgjegjshëm dhe kanë dhënë përgjigjen e tyre përmes votës. Ka qenë një sulm politik ndaj një personi që ka mbrojtur gjithmonë interesin publik dhe qytetar. Unë falënderoj të gjithë qytetarët shkodranë për mbështetjen e tyre dhe që kanë zgjedhur të votojnë Partinë Demokratike në një situatë jashtëzakonisht të vështirë dhe me një batërdi elektorale, e cila ka nevojë për shqyrtim dhe reflektim të thellë.
Unë mendoj se qytetarëve shqiptarë duhet t’u rikthehet e drejta e votës, e cila është eliminuar dhe asgjësuar nga një mazhorancë që prej 12 vitesh nuk lejon që qytetarët shqiptarë të shprehen përmes votës së lirë. Vota e shqiptarëve është tjetërsuar në mënyrën më të turpshme të mundshme. Ka pasur një maskaradë elektorale, për të cilën jemi të gjithë të vetëdijshëm, dhe ka nevojë për reagim dhe reflektim nga ata që kanë marrë përsipër të tjetërsojnë vullnetin e qytetarëve shqiptarë.
Ka qenë një luftë e jashtëzakonshme në kushte të pabarabarta, me shtetin të bërë njësh me krimin dhe përdorimin e të gjitha resurseve publike e shtetërore në funksion të tjetërsimit të vullnetit të qytetarëve shkodranë. Do të kishte krejt tjetër rezultat – dhe Shkodra, padyshim, do të kishte një rezultat tjetër – ashtu si e gjithë Shqipëria. Kjo është një masakër elektorale që duhet të marrë fund, dhe përgjegjës për këtë janë persona me emër dhe mbiemër: Edi Rama dhe qeveria e tij”, tha Bardh Spahia.
