Një 53-vjeçar është arrestuar nga policia në Malësi të madhe, pasi ishte në kërkim për veprimtari kriminale.
Sipas policisë, në pranga ka rënë shtetasi Lek Kokaj, 53 vjeç, banues në fshatin Ivanaj, i cili ishte shpallur në kërkim pasi Gjykata e Shkallës së Parë e Juridiksionit të Përgjithshëm Shkodër i kishte caktuar masën e sigurisë “Arrest në burg”, për veprën penale “Kultivimi i bimëve narkotike”, kryer në bashkëpunim.
Hetimet tregojnë se në muajin korrik të vitit 2023, L. K. dyshohet se ka kultivuar 161 bimë narkotike të llojit kanabis në bashkëpunim me tre shtetas të tjerë, në territorin e fshatit Ivanaj.
Materialet procedurale në ngarkim të tij i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme ligjore.
Policia e Malësisë së Madhe thekson se operacionet për goditjen e paligjshmërisë dhe kapjen e personave në kërkim do të vijojnë me intensitet të lartë.
