Qeveria, përmes ministres Belinda Balluku, ka njoftuar se ditën e nesërme (24 Maj) do të rihapet tuneli i Llogarasë vetëm për automjetet, jo për mjetet e tonazhit të rëndë, teksa ky projekt është konsideruar si një aferë korruptive, e cila po hetohet nga SPAK.
Tuneli ishte i hapur edhe vitin e kaluar nga 5 korrik, deri më 5 nëntor, ku u mbyll sërish për të përfunduar punimet.
Sipas Ballukut, kalimi në tunel do të jetë pa pagesë deri më 15 shtator, teksa më pas, për të kaluar me automjet aty do të duhet të paguash 5 euro, ashtu siç e ka njoftuar më herët vetë ministrja e Infrastrukturës, edhe pse i ndërtuar me paratë e taksapaguesve, pa asnjë formë financimi privat.
Shifra prej 5 euro shtë konsideruar si një abuzim stratosferik, duke marrë parasysh faktin se jo vetëm që është ndërtuar nga lekët e taksapaguesve, por bëhet fjalë vetëm për kalimin në një tunel të vetëm dhe me një gjatësi prej 6 kilometrash.
Sipas autoriteteve, tarifa prej 5 eurosh është e nevojshme për të përballuar kostot e larta të mirëmbajtjes, pasi Qeveria do të lidhë kontratë me një tjetër operator privat për mirëmbajtje dhe operimin e tunelit.
Deri më tani, kostoja e tunelit të llogarasë ka shkuar në mbi 260 milionë euro dhe janë bërë tre tendera, ku ekspertët kanë ngritur dyshime për korrupsion dhe konflikt interesi.
Dyshohet se vlera e projektit është fryrë fiktivisht me 30 deri në 50 milionë euro, të cilat i kanë shkuar një kompanie turke, e cila nuk ka kryer asnjë punë.
Pas lajmit për rihapjen e tunelit, ka ardhur një reagim edhe nga deputeti demokrat Gazment Bardhi, i cili në një postim në rrjetet sociale shprehet se Belinda Balluku u rikthye në vendin e krimit, teksa i kërkon SPAK-ut që t’u jap përgjigje pyetjes së shqiptarëve se ku shkuan 50 milionë euro.
Postimi i plotë i Gazment Bardhit:
Belinda Balluku qenka rikthyer në vendin e krimit dhe paska njoftuar rihapjen e Tunelit të Llogarasë. Kjo është një aferë e pastër korruptive, ku vlera e ndërtimit u shtua me miliona euro, që i kaluan një kompanie turke, që ishte paracaktuar nga Balluku dhe që rezulton me dokumente zyrtare që nuk ka kryer asnjë punim.
Ekzistojnë të dhëna, përfshirë dëshminë publike të një prej pjesëmarrësve në takim, se kompania fiktive turke u paracaktua si fituese në një takim në Ankara, Turqi, të zhvilluar në datën 3 Qershor 2021, pra 21 ditë para rishpalljes së tenderit.
Pyetja që po pret përgjigje nga SPAK që prej 12 Gushtit 2024 është: Ku kanë shkuar 50 milionë euro të taksave të shqiptarëve? Edhe sa kohë do presin shqiptarët për një përgjigje?
