Presidenti amerikan Donald Trump konfrontoi presidentin e Afrikës së Jugut, Cyril Ramaphosa, në Shtëpinë e Bardhë të mërkurën duke i shfaqur një video që dyshohet se tregon trajtim të rëndë të fermerëve të bardhë.
Trump ka pohuar se fermerët e bardhë afrikano-jugorë po vriten dhe masakrohen dhe po detyrohen të largohen nga tokat e tyre.
Ndërkohë për videot që Trump i shfaqi, presidenti i Afrikës së Jugut, Cyril Ramaphosa tha se nuk ka dijeni duke u shprehur: “Do të doja të dija se ku është kjo sepse këto videot nuk i kam parë kurrë”.
Trump vazhdoi: “Këta janë njerëz që janë zyrtarë dhe po thonë… vritni fermerin e bardhë dhe merrni tokën e tyre.”
Presidenti amerikan u tregoi gjithashtu gazetarëve një numër artikujsh lajmesh, të cilët ai tha se ishin nga ditët e fundit të “vdekjes së njerëzve, vdekjes, vdekjes, vdekjes, vdekjes së tmerrshme, vdekjes”.
Trump tha: “Shikoni këtë titull, një çift i bardhë nga Afrika e Jugut thotë se u sulmuan dhunshëm.”
Ai shtoi në një artikull tjetër: “Këtu ka varre kudo, të gjithë janë fermerë të bardhë që po varrosen.” Dhe duke shfletuar artikujt, ai tha se ato ishin të njerëzve që “u vranë së fundmi dhe nuk e di se si mund të përkeqësohet më shumë”.
Ramaphosa u përgjigj: “Ajo që patë, fjalimet që po mbaheshin, nuk është politikë qeveritare.
Ne kemi një demokraci shumëpartiake në Afrikën e Jugut që u lejon njerëzve të shprehen, partive politike t’i përmbahen politikave të ndryshme. Dhe në shumë raste ose në disa raste, këto politika nuk shkojnë së bashku me politikën qeveritare.”
“Politika jonë qeveritare është plotësisht, plotësisht kundër asaj që ai [një person në videomontazh] po thoshte. Edhe në parlament. Dhe ata janë një parti e vogël minoritare që lejohet të ekzistojë sipas kushtetutës sonë.”
