Biseda telefonike midis dy presidentëve, atë të Shteteve të Bashkuara, Donald Trump dhe të Rusisë, Vladimir Putin, ka përfunduar.
Telefonata e cila zgjati për më shumë se dy orë, nuk duket se ka ndonjë rezultat konkret prej saj, por ka pasur pëlqyeshmërinë e Putin për pranimin e një memorandumi armëpushues në Ukrainë.
Presidenti i Rusisë ka reaguar për një media vendase, duke u shprehur se biseda mes tyre ishte kuptimplotë, e sinqertë dhe shumë e dobishme. Për Putin, Moska është në favor të ndalimit të armiqësive, por është e nevojshme të zhvillohen rrugët më efektive drejt paqes.
Rezultati paraprak është se Moska dhe Kievi duhet të gjejnë kompromise që do t’u përshtaten të gjitha palëve.
Më herët, Sekretarja e Shtypit të Shtëpisë së Bardhë, Karoline Leavitt, foli shumë pak lidhur me këtë telefonatë që do të mbahet mes presidentësh, duke mos premtuar shumë mbi rezultate, por njëherazi dhe duke mos treguar diçka të re.
Duket se Trump i ka humbur durimi me Ukrainën dhe Rusinë, bazuar në deklaratën e Leavitt për media, pasi kjo e fundit u shpreh se Presidenti është i acaruar me të dyja palët e konfliktit.
“Ai e ka bërë shumë të qartë se deshiron të shohë një marrëveshje paqeje e t’i japë fund armatimeve sa më shpëjt të jetë e mundur. Presidenti e ka bërë shumë të qartë qëllimin e tij, të shohë armëpushimin dhe t’i vijë fundi këtij konflikti. Ai po acarohet me të dyja palët e konfliktit. Presidenti dhe ekipi i tij kanë vënë shumë mund për të zgjidhur këtë luftë të komplikuar, i cili filloi nga dobësia e administratës së kaluar”, tha Leavitt.
