Është zbardhur plagosja në këmbë e 28-vjeçarit, Kristian Kaçorri, i cili u paraqit në spital i plagosur me plumb në këmbë.
Policia bën me dije se dyshohet se i riu është vetëplagosur aksidentalisht. Kaçorri është arrestuar nga ‘blutë’ e kryeqytetit, ndërsa ndodhet jashtë rrezikut për jetën në spital.
Në pranga kanë rënë edhe dy persona të tjerë, ndërsa një 41-vjeçar është shpallur në kërkim nga policia pasi kanë fshehur armën e zjarrit dhe kanë fshirë vendin e ngjarjes.
“Pas njoftimit të marrë se rreth orës 01:20, datë 18.05.2025, në spital kishte shkuar për mjekim, një shtetas i dëmtuar në këmbë, shërbimet e Komisariatit të Policisë Nr. 2 nisën hetimet me qëllim zbardhjen e rrethanave dhe dokumentimin e saj dhe si rezultat i veprimeve të shpejta hetimore dhe profesionale, në përfundim të tyre arrestuan shtetasit:
- K., 28 vjeç, A. C., 33 vjeç dhe A. M., 30 vjeç, të tre banues në Tiranë. Si dhe shpallen në kërkim shtetasin E. E., 41 vjeç, banues në Kucovë.
Nga hetimet e deritanishme dyshohet se 28-vjeçari është vetëplagosur aksidentalisht, në ambientet e një lokali në Komunën e Parisit, me një armë zjarri, të cilën e posedonte pa leje. Aktualisht, ky shtetas është në kujdesin e mjekëve dhe jashtë rrezikut për jetën.
Ndërkohë, shtetasit A. C dhe E. E, kanë marrë armën e zjarrit dhe gëzhojën dhe i kanë fshehur në një ambient jashtë lokalit, ndërsa shtetasi A. M(kamarieri i lokalit) ka fshirë vendin e ngjarjes”, thuhet në njoftimin e policisë.
Materialet procedurale iu referuan Prokurorisë së Tiranës, për veprime të mëtejshme.
