Komisioneri Shtetëror i Zgjedhjeve Ilirjan Celibashi ka anuluar pothuajse të gjitha akreditimet për vëzhguesit e partive në qendrat e numërimit për votat e diasporës në Parkun Olimpik “Feti Borova” në kryeqytet, me përjashtim të atyre ndërkombëtarë.
Në vendimin që mban firmën dhe vulën e kreut të KQZ-së, thuhet se secili prej 11 subjekteve politike në garën elektorale ka të drejtën të ketë vetëm një vëzhgues të akredituar për çdo grup numërimi, si edhe një vëzhgues për çdo qark.
Sipas vendimit, do të lejohen vetëm vëzhguesit e mediave me akreditim dhe ata ndërkombëtarë. Do të lejohen vëzhgues edhe nga shoqëria civile, por vetëm pasi të bëjnë aplikimin sipas procedurave.
Kërkesat duhet të paraqiten në KQZ deri ditën e nesërme më 16 maj, deri në orën 12:00 për shoqëritë civile dhe deri në 24:00 për ata të partive politike.
Celibahsi sqaron se kundër këtij vendimi mund të bëhet ankimimi brenda 3 ditëve nga shpallja e tij, sipas ligjit.
Ky vendim vjen në prag të mbledhjes së nesërme që do zhvillohet pas kërkesës së PS për të nisur numërimi i votave të bllokuara të diasporës së Greqisë. PS ka akuzuar Celibashin për shkelje të ligjit me pranimin që në fillim të kërkesës së PD për të bllokuar këtë numërim. Nesër pritet të vendoset hapja dhe numërimi i 53 mijë zarfeve nga Greqia.
