Në zgjedhjet parlamentare të 11 Majit një situatë interesante ishte Qarku i Korçës, ku për shkak të uljes së mandateve në 10, demokratët mund ta arrinin ta çonin rezultatin në barazim, duke i ndarë mandatet në 5 me 5 për secilën prej dy subjekteve kryesore politike.
Kjo gjë nuk u arrit, ku edhe pas uljes së mandateve, socialistët arritën t’i ruanin 6 deputetë në këtë qark, ndërsa PD-ja zbriti në 4 mandate. E duket se pas rezultatit kanë filluar edhe akuzat në kampin blu në Korçë.
PD arriti të fuste vetëm 1 deputet nga lista e hapur, ku më i votuari rezultoi Fidel Kreka me 6523 vota, i cili kishte edhe mbështetjen e kandites së listës së mbyllur Ledina Alollit.
I dyti më i votuari rezultoi Kristiano Koçibelli me 5213 vota personale, por pa arritur të futet në Kuvend. Ky i fundit, në reagimin falenderues ndaj demokratëve pas rezultatit, nuk nguron të hedh edhe akuza ndaj kandidates në listën e mbyllur.
Koçibelli shkruan se gjatë kësaj fushate, synimi kryesor i tij ka qenë që të prodhonim sa më shumë mandate për Partinë Demokratike, por sipas tij, jo të gjithë kandidatët kanë vepruar si ai.
Edhe pse nuk e përmend me emër Ledina Alollit, Koçibelli shkruan se kandidatja e listës së mbyllur çireshe në fushatë jo për Partinë, por për listën e hapur.
Postimi i plotë:
Përshëndetje miq,
Pas përfundimit të procesit të numurimit të votave edhe për kandidat, rezulton se unë kam marrë 5206 vota, kandidati I dytë më I votuar në qarkun e Korçes nga Partia Demokratike. Faleminderit nga zemra për çdo votë, për mbështetjen ndaj emrit tim, për besimin, për bisedat që kemi zhvilluar së bashku, për takimet me orë të gjata.
Dua ti kërkoj ndjesë familjes sime të cilës i kam munguar për gati 40 ditë, prindërve të mi të cilët mërziten dhe emocionohen nga garat që ne zhvillojmë.
Nga kjo fushatë mësova shumë, pashë një realitet tjetër që nuk e kisha menduar ndonjëherë, njoha njerëz të rinj dhe mbi të gjitha njoha më mirë ata që kam pas njohur me vite.
Gjatë gjithë fushatës u përpoqa të isha vetvetja, një njeri që bën garën me dinjitet, i rrethuar me njerëz me reputacion dhe të respektuar për komunitetin, fushatë pa fyerje dhe ofendime, fushatë ku synimi kryesor ishte të prodhonim sa më shumë mandate për Partinë Demokratike. Por jo të gjithë e bënë këtë si unë, ajo e listës së mbyllur çireshe në fushatë jo për Partinë, por për listën e hapur.
Miq, unë do vazhdoj të jem përsëri I njëjti, i dashur me komunitetim, i përkushtuar për Korçën dhe Shqipërinë.
5200 falenderime për secilin prej jush, jam mirënjohës në pafundësi për besimin e dhënë.
Përqafime
