Një aksident me vdekje e një efektivi policie është regjistruar mesditën e kësaj të enjte, rreth orës 12:00, në aksin rrugor Borsh–Fterrë në Vlorë.
Autoritetet policore raportojnë se drejtuesi i një automjeti tip “Toyota” dyshohet se ka humbur kontrollin mbi drejtimin e mjetit dhe si pasojë makina ka dalë nga rruga duke përfunduar në një kanal anësor.
Në automjetin e aksidentuar udhëtonin tre persona, konkretisht shtetasit R. X., V. Th., dhe E. M., rreth 47 vjeç. Ky i fundit, efektiv policie, ka ndërruar jetë në vendin e ngjarje, si pasojë e dëmtimeve të marra, ndërsa dy të tjerët janë dërguar në spital, në gjendje të rëndë shëndetësore.
Policia thotë se grupi hetimor po punon për zbardhjen e plotë të rrethanave të aksidentit, si dhe përcaktimin e drejtuesit të mjetit në momentin e ngjarjes.
