Ish-presidenti i Filipineve, Rodrigo Duterte, i cili ndodhet në paraburgim në Hagë për shkak të hetimeve nga Gjykata Penale Ndërkombëtare mbi luftën e tij të përgjakshme kundër drogës, është rizgjedhur si kryetar i qytetit të tij të lindjes, Davao, shkruan A2 CNN. Rezultatet paraprake të zgjedhjeve të mesit të mandatit tregojnë se familja Duterte vazhdon të mbajë pushtetin në jug të vendit.
Pavarësisht arrestimit të tij në mars dhe transferimit të menjëhershëm në Hagë, emri i Dutertes qëndroi në fletën e votimit, pasi ai ende nuk është dënuar. Rizgjedhja e tij nuk ishte surprizë, pasi familja Duterte ka kontrolluar Davaon që nga vitet 1980. Djali i tij më i vogël, Sebastian Duterte, u zgjodh nënkryetar, ndërsa djali tjetër, Paolo Duterte, u rizgjodh deputet. Edhe nipërit fituan poste lokale.
Ndërkohë, aleatët më të afërt të Dutertes, senatori Bong Go dhe ish-shefi i policisë Ronald “Bato” dela Rosa, u rizgjodhën në senat. Ata ishin figura kyçe në zbatimin e politikës së ashpër kundër drogës gjatë presidencës së Dutertes.
Zgjedhjet u zhvilluan në një atmosferë të tensionuar, ku dominoi rivaliteti politik midis familjeve Duterte dhe Marcos. Presidenti aktual Ferdinand “Bongbong” Marcos Jr., dikur aleat i familjes Duterte, tani është në konflikt të hapur me zëvendëspresidenten Sara Duterte, vajzën e ish-presidentit. Ajo përballet me një proces të mundshëm shkarkimi nga senati dhe fati i saj politik mbetet ende i paqartë.
Pavarësisht tensioneve, familja Duterte duket se ka ruajtur bazën e saj të fuqishme në jug të vendit, duke forcuar pozicionin për zgjedhjet presidenciale të vitit 2028.
