Partizani ka arritur të fitojë sot me rezultatin 2-1 kundër Dinamos, në duelin që caktonte vendin e tretë të Kategorisë Superiore, një ndeshje pa shumë interes duke qenë se të dy ekipet e kishin siguruar një vend për në kualifikueset e Conference League.
Ashtu siç e kishte paralajmëruar edhe trajneri Skënder Gega, Partizani kishte bërë rotacion, duke aktivizuar lojtarë që kishin luajtur pak gjatë këtij kampionati apo lojtarë të akademisë, ndërsa Dinamo luante me ekipin e parë.
Të parët që kaluan në avantazh ishte “nëndetësja blu”, e cila gjeti rrugën e rrjetësë që në minutën e 16′ të takimit me anë të Dejvi Bregut, pas një aksioni perfetk, teksa asisti u dha nga Maliqi.
Barazimi për të kuqtë do të vinte në minutën e 37′ me anë të debutuesit 17-vjeçar Tedi Malaj. Fillimisht goli u akordua për pozicion jashtë loje, por më pas u konfirmua nga VAR.
Me shifra të barabarta u mbyll fraksioni i parë i lojës, teksa pjesa e dytë do të niste menjëherë me gol për të kuqtë. Ishte 20-vjeçari Besar Gudjufi i cili kaloi në avantazh ekipin e tij në minutën e ’46, teksa ky ishte edhe goli i parë për të me Partizanin.
Dinamo, pavarësisht tentativave, u tregua e pafuqishme për t’i shënuar portierit 20-vjeçar Skënder Tahri.
Vlen të theksohet fakti se Dinamon në këtë ndeshje e drejtoi zëvendëstrajneri Glen Daja, i cili zëvendësoi Ilir Dajën e pezulluar nga Disiplina.
Për Partizanin, debutuan plot gjashtë lojtarë: Tahri, Himallari, Malaj, Çipi, Ogunleje dhe Vata, me dy emrat e fundit që u aktivizuan nga stoli.
Kujtojmë se finalja e madhe e titullit kampion, do të luhet mes Vllaznisë dhe Egnatias ditën e Hënë.
