Përfaqësuesi ligjor i PD-së, Franc Nuri, në një konferencë për mediat, theksoi shqetësimet lidhur me procedurat e ndarjes dhe numërimit të votave të ardhura nga jashtë, sidomos ato nga Greqia.
Nuri u shpreh se janë konstatuar parregullsi serioze që lidhen me mënyrën se si janë administruar disa fletë votimi që pretendohet se kanë ardhur nga diaspora, pa ndjekur protokollin ligjor të përcaktuar. Ai theksoi se disa zarfe me fletë votimi kanë mbërritur në Komisionin Qendror të Zgjedhjeve jashtë rrugës zyrtare dhe janë tentuar të përfshihen në kutitë e votimit si të rregullta.
Këto veprime janë në kundërshtim me ligjin dhe cenojnë integritetin e procesit zgjedhor.
Partia Demokratike ka dorëzuar kërkesa urgjente dhe ka kërkuar ndërhyrjen e menjëhershme të Komisionerit Shtetëror të Zgjedhjeve, Ilirjan Celibashi, për të ndalur çdo tentativë të përfshirjes së paligjshme të votave që nuk kanë ndjekur procedurën e përcaktuar me ligj.
Deklarata:
Një sqarim nga ana procedurale dhe ligjore:
Të gjitha këto shqetësime janë të drejta dhe i kemi ngritur edhe më herët. Pasi kemi rënë në dijeni të disa indicieve që tregonin se fletë votimi ose zarfe me fletë votimi nga diaspora kishin mbërritur në protokollin e KQZ-së, ose edhe në rrugë të tjera jozyrtare, ne kemi bërë një kërkesë zyrtare pranë KQZ-së. Si përgjigje, kemi marrë një njoftim ku konfirmohej se disa fletë votimi të tilla ekzistonin.
Sot është tentuar që këto fletë votimi të dërgohen me kuti dhe të futen brenda zarfave të tjera sipas qarqeve, duke u trajtuar sikur kanë ardhur në rrugë dhe protokoll normal. Kjo nuk është e vërtetë. Këto zarfe janë bllokuar nga përfaqësuesit tanë pranë KZAZ-së së diasporës dhe nuk do të lejohen të llogariten bashkë me votat e tjera të rregullta.
Kjo sepse ligji dhe rregullorja e përcaktojnë qartë:
Fletët e votimit nga diaspora duhet të vijnë nga vetë diaspora, të kalojnë përmes pikës doganore në Rinas, të zhdoganohen, të dorëzohen tek operatori postar, dhe të transportohen të blinduara deri në Parkun Olimpik. Ky është protokolli i përcaktuar me ligj.
Asnjë votë e ardhur jashtë këtij protokolli dorazi, nëpërmjet operatorëve apo postave të ndryshme nuk mund të administrohet.
Ne po dorëzojmë kërkesa urgjente në këtë drejtim, që Komisioneri Celibashi të marrë masa dhe të lëshojë urdhra për ndalimin e këtyre praktikave të paligjshme.
