Partia Mundësia ka mbyllur mbrëmjen e sotme (9 maj) fushatën elektorale në Pallatin e Kongreseve.
Drejtuesi i kësaj force politike, Agron Shehaj, gjatë fjalës së tij është shprehur se ky është vetëm fillimi i punës së tyre dhe se më 11 maj, ditën e zgjedhjeve, do të nisë ndryshimi për të cilin vendi ka nevojë.
“Jemi në ditën e fundit të fushatës. Na kanë sulmuar në televizione, debate, takime dhe rrjete sociale. Kanë thënë se nuk do ia dalim, kanë thënë se do na ndalojnë dhe se jemi të pafuqishëm për të mbrojtur votat tona. Në sulmojnë se e shohin se diçka e madhe po ndodh në Shqipëri, po çlirohet një potencial, një energji dhe një besim i pandalshëm. Koha për ndryshim është tani dhe kjo është ajo që i shqetëson.
Muajt e fundit kemi filluar të shkundin politikën shqiptare dhe kemi një mesazh të qartë për të gjithë. Ky është vetëm fillimi.
Të dielën kur të dilni dhe të votoni Partinë Mundësia, aty do të nisë ndryshimi për të cilin vendi ka nevojë. Kjo është arsyeja pse ata janë të shqetësuar.
Ne do ia dalim, mos kini asnjë dyshim.
Por, le të jemi të qartë. Ata kanë frikë nga ne sepse e dinë që nuk blihemi, sepse ia kemi dalë me punë të ndershme.
T’i heqësh shtetin nga kurrizi shqiptarëve nuk është thjesht një premtim, është një vizion, është zgjidhja për ta bërë Shqipërinë një vend të pasur. Sepse më pak shtet do të thotë të çrrënjosesh korrupsionin.
Të dielën kemi një mundësi unike në historinë e Shqipërisë. Për 35 vite kemi jetuar në duopol që ka zgjatur shumë. Sot politikanët e këtyre dy partive mendojnë vetëm për veten e tyre, prandaj krijuam Mundësinë një vit më parë, për të ofruar një alternativë të vërtetë, jo thjesht një rotacion”, tha ai.
