Luzi 2008, edhe pse militon në kategoritë e ulëta, falë punës dhe seriozitetit ka arritur të rrisë futbollistë cilësorë duke furnizuar mjaft klube shqiptare, që nga Bylis, Besa, Lushnja e të tjera.
Padyshim, “xhevahiri” i tyre mbetet Itodo Mandela, të cilin një vit më parë presidenti Albert Lusha preferoi t’ia shiste Dinamos.
Te blutë, 21-vjeçari u kthye në një yll dhe makineri golash, duke i paraprirë suksesit të bluve në kampionat. Së fundmi, ai rezultoi protagonist për dinamovitët në fitimin e Kupës së Shqipërisë.
Falë formulës së shitjes, por edhe rritjes së vlerës së kartonit të Mandelës, Luzi 2008 do të përfitojë shuma të mëdha nëse nigeriani transferohet në një klub europian.
Në intervistën e dhënë për “Panorama Sport”, presidenti i Luzit 2008, Albert Lusha, tregon gjithë historinë e kalimit të Mandelës te blutë e kryeqytetit.
Besonit se ai do kthehej në një futbollist kyç te blutë? Sigurisht që po. Mandela tregoi cilësi, vlera dhe profesionalizëm kur mbante veshur fanellën tonë. Ju them se një lojtar cilësor si ai shpesh u bë pre e ndërhyrjeve të ashpra nga kundërshtarët. Që Mandela ishte lojtar cilësor, e dinim qëkur e afruam. Ndërsa luante me Luzi 2008, në disa takime shihje menaxherë të shumtë të ekipeve elitare shqiptare në tribunë vetëm për të vëzhguar Mandelën, që na jepnin oferta të ndryshme për ta bërë të tyrin.
Ekipet e interesuara për Mandelën – Ishin ekipe nga brenda Shqipërisë, por dhe nga jashtë. Nuk përbën më sekret dhe po ua rendis. Ka qenë Partizani, Egnatia, Tirana, Skënderbeu, Dinamo, por edhe Ballkani i Suharekës, Shkëndija e Tetovës dhe disa ekipe në Ukrainë e Turqi.
Pse u preferua Dinamo? Së pari, më bindi korrektësia e presidentit të Dinamos, Ardian Bardhi, si dhe projekti që ai kishte për ekipin. Një lojtar si Mandela kërkonte një ekip me ambicie dhe argument shtesë për këtë ishte edhe premtimi i presidentit Bardhi, që do të merrte si trajner Ilir Dajën, tek i cili kam besim të madh si teknik. Koha më dha të drejtë, pasi Bardhi dhe Daja arritën të krijonin atë ekip në të cilin Mandela u bë “violinë” e parë.
Marrëveshja me Dinamon- Logjikisht, një “minierë” si Itodo Mandela nuk mund t’i dhurohej askujt. Presidenti Bardhi pranoi me korrektësi, transparencë e ndershmëri, të na jepte 50% të kartonit. Pra, aktualisht zotërojmë 50% të kartonit të Itodo Mandelës. I urojmë atij të shkojë sa më larg, pasi vërtet është një talent dhe profesionist i vërtetë.
