Nga Boldnews.al
Bashkia e Durrësit ka anuluar tenderin me vlerë mbi 300 mijë euro për “Ndërtimin e rrjetit të kanalizimeve Rrushkull”, pasi ka skualifikuar të gjithë kompanitë pjesëmarrëse, plot 20 të tilla.
Një situatë, në dukje absurde, që krijon dyshimet se ndonjë prej kompanive të paracaktuara nga administrata e Emirjana Sakos për të fituar këtë procedurë nuk ka pasur shanse për t’u shpallur e suksesshme.
Këtë fundjavë, Bashkia e Durrësit ka shpallur në portalin e Agjencisë së Prokurimit Publik (APP) njoftimin për anulimin e procedurës me fond limit 32.9 milionë lekë të reja. Sipas njoftimit të shkurtër, arsyeja e anulimit është: “Në procedurat me një fazë nuk është dorëzuar asnjë ofertë e përshtatshme”.
Për momentin, Bashkia e Emirjana Sakos nuk jep të dhëna se sa është numri i pjesëmarrësve dhe për cilat arsye janë skualifikuar të gjithë.
“Boldnews.al” ka mësuar se në këtë procedurë kanë marrë pjesë 20 operatorë ekonomikë. Ofertat e paraqitura prej tyre variojnë nga 20.4 milionë lekë deri tek 30.2 milionë lekë të reja. Nuk rezulton asnjë prej konkurentëve që të mos ketë paraqitur ofertë ekonomike.
Këto të dhëna dëshmojnë se tenderi për ndërtimin e kanalizimeve të Rrushkullit ka pasur një garë reale dhe të fortë.
Por, diçka duhet të ketë ndodhur brenda Bashkisë së Durrësit. Duket se stafi i Bashkisë duhet të ketë pasur “dëshirë” që fitues të ketë qenë njeri prej operatorëve pjesëmarrës. Në pamundësi që ky “i paracaktuar” të fitonte këtë garë, atëherë administrata mund të ketë vendosur që të anulojë tërësisht procedurën.
Gjithësesi, ky skenar për momentin është hipotetik. Kjo lloj skeme mund të marrë një lloj konfirmimi, nëse operatorët e skualifikuar të ndjekin rrugën administrative të ankimit.
Tenderi me vlerë mbi 300 mijë euro u shpall në 4 Prill 2025 dhe Bashkia e Durrësit caktoi afat 2-javor për dorëzimin e ofertave nga ana e kompanive të interesuara.
Sipas dokumentave zyrtare, kjo procedurë po zhvillohet referuar problematikave të shkaktuara nga fenomeni i daljes së ujërave të ndotura në sipërfaqe në rrugët kryesore të zonës, si dhe shqetësimeve të herëpasherëshme të banorëve të kësaj zone për pasojat e këtij fenomeni për shkak të dëmtimeve dhe mungesa e tyre.
Këto problematika shkaktojnë përmbytje në ditët me rreshje të shumta atmosferike, duke sjellë shqetësime jo vetëm për banorët e zonës, por edhe për qarkullimin e mjeteve, si dhe në faktin që pjesa e parë e kolektorit kryesor të ujërave të ndotura kalon nëpër disa shtëpia private, duke krijuar kështu shqetësime jo vetëm për qytetarët, por edhe mosfunksionim të mirë kanalizimeve.
