Vllaznia dhe Dinamo përballen të dielën në orën 20:00 në “Arenën Kombëtare” në Tiranë për gjysmëfinalen e “Final 4”, mini-turneut që do vendos për skuadrën kampione në Superligë për këtë sezon.
Përpara ndeshjes për mediet foli Thomas Brdaric. Trajneri i Vllaznisë kërkon me çdo kusht fitoren dhe finalen e 12 majit.
Për shkak të renditjes më sipër në sezonin e rregullt, Vllaznia ka avantazhin që të kalojë në finale edhe me barazim, por Brdaric bën apel që të kërkojnë suksesin e plotë për mos rrezikuar.
Dinamo vjen nga fitorja e Kupës së Shqipërisë vetëm dy ditë më parë kundër Egnatias.
Final 4 dhe Dinamo – E dimë që nesër është një ndeshje e madhe. Po punojmë fort për të hedhur hapin e rëndësishëm, atë të shkuarjes në finale. Vërtetë ne kemi edhe avantazhin e barazimit nesër, por ne shkojmë vetëm për fitore. Gjithsesi do të ruajmë një balancë, si në mbrojtje ashtu edhe në sulm.
Barazim? Nuk duhet të mendojmë fare për barazimin, por për ta fituar ndeshjen. Kemi luajtur edhe 6 herë të tjera me Dinamon dhe e njohim mjaft mirë njëri- tjetrin, por kuptohet që çdo ndeshje ka specifikën e vet dhe këtë herë ne do të tentojmë me çdo kusht fitoren.
Për ne si staf nuk është koha të ëndërrojmë. Është koha të punojmë sa më mirë për ta përgatitur skuadrën si duhet dhe së bashku të bëjmë realitet atë çfarë ëndërrojnë tifozët. Nuk e kemi mendjen aspak tek finalja e 12 majit, por vetëm tek ndeshja e nesërme. Unë besoj se Vllaznia do të jetë në finale dhe bashkë me mua edhe e gjithë skuadra beson”, tha Thomas Brdaric mes të tjerash.
Gjysmëfinalja tjetër, e cila luhet të hënë po në 20:00 në “Arenën Kombëtare” është ajo mes Egnatias dhe Partizanit.
