Këshilli Bashkiak i Durrësit është përfshirë nga debate të forta në mbledhjen e tij të fundit që u zhvillua mesditën e së mërkurës (30 prill). Pika e nxehtë e debatit ka qenë votimi për resortin “Lura 5” të biznesmenit Dod Doçi në Gjirin e Lalzit.
Këshilli Bashkiak i Durrësit ishte mbledhur për të votuar ndryshimin e kategorisë për një sipërfaqe pyjore prej 8000 metra katrorë, e cila do të rrafshohet në funksion të ndërtimit të resortit.
Partia Demokratike është shprehur kundër projektit. Tre këshilltarët e saj që ishin të pranishëm në mbledhje kundërshtuan betonizimin e mëtejshëm të bregdetit duke votuar kundër.
Këshilltarët Ardian Muka dhe Dritan Burgija u shprehën në fjalën e tyre në këshill se nuk ishin kundër zhvillimit, por bregdeti i Durrësit është betonizuar dhe një tjetër resort do të përkthehet në më pak gjelbërim.
Partia tjetër opozitare, ajo e Lirisë shkoi në krahun tjetër. Këshilltarët e partisë së Ilir Metës, bashkuan votat me Partinë Socialiste dhe me 31 vota pro miratuan ndërtimin e resortit.
Këshilltarët e majtë thanë se kompleksi pritet t’i japë një hov më të madh zhvillimit të turizmit dhe në të do të punësohen dhjetëra punonjës.
Kush është Dod Doçi?
Dod Doçi është një nga ndërtuesit më të mëdhenj në bregdetin e Gjirit të Lalzit. Deri më tani ai ka ndërtuar 5 komplekse turistike në këtë zonë, të pagëzuar me emrin Lura, duke i hequr kështu zonës një sipërfaqe të madhe gjelbërimi. I fundit kompleks në radhë, ai i cili përçau dhe koalicionin opozitar, quhet “Lura 5”.
Ndërtimi i resortit turistik “Lura 5” ka marrë më parë aprovimin e Këshillit Kombëtar të Territorit (KKT).
