Skënderbeu ra nga kategoria dhe përgjatë edicionit të ardhshëm do të luajë në Kategorinë e Parë. Korçarët u mposhtën në shtëpi nga Bylisi, që siguroi mbijetesën.
Presidenti i Skënderbeut, Ardian Takaj, nëpërmjet një postimi në faqen zyrtare në “Facebook”, ka reaguar sot pas rënies së klubit nga elita e futbollit shqiptar.
Numri një i bardhekuqve, u ka kërkuar ndjesë të gjithëve për zhgënjimin, teksa premton se Skënderbeut do të rikthehet më i fortë se kurrë më parë.
Reagimi i Ardian Takajt
Të dashur tifozë të Skënderbeut,
Sot jemi të detyruar të pranojmë një realitet të hidhur: Skënderbeu ka rënë nga Kategoria Superiore. Kjo është një goditje e rëndë për historinë, krenarinë dhe përkushtimin tonë si klub dhe si qytet.
Unë, si president i klubit, e ndjej përgjegjësinë e plotë. Ju kërkoj ndjesë të gjithëve — për zhgënjimin, për pritshmëritë e thyera dhe për dhimbjen që kjo sjell tek çdo korçar që rreh me zemër për Skënderbeun.
Por nuk jemi të mposhtur.
Rënia nuk është fundi ynë. Është momenti për të reflektuar, për të pastruar, për të ndërtuar nga e para, me përulësi dhe vendosmëri. Skënderbeu do të rikthehet. Me ndihmën tuaj, me dashurinë tuaj dhe me besimin tuaj, ky klub do të ngrihet më i fortë se kurrë më parë.
Ju falënderoj për besnikërinë tuaj. Ju meritoni më shumë, dhe unë ju premtoj se do të bëjmë gjithçka për ta rikthyer lavdinë e humbur.
Përpara Skënderbeu!
