Tirana do të luajë në play-out kundër Pogradecit këtë të diel për të drejtën që të jetë pjesë e Kategorisë Superiore edhe në sezonin e ardhshëm.
Një ndeshje ku bardheblutë, ashtu si edhe ekipi kundërshtar, duhet medoemos të fitojnë pasi nuk është në fuqi rregulli i barazimit si favor për skuadrën që vjen nga lart.
I vetmi avantazh që ka Tirana është ai i stadiumit, pasi do të jetë pritëse në këtë sfidë. Por edhe në këtë rast, avantazhi nuk bën punë pasi bardheblutë nuk kanë një impiant të tyrin për të luajtur ndeshjet e nuk mundet as të luajnë në ”Arenën Kombëtare” pasi të dielën fillojnë ndeshjet e ”Final Four”.
Sipas asaj që bëhet e ditur për bardheblutë ka tre stadiume ku mund të luajnë si pritës.
Opsioni i parë është “Elbasan Arena”, ndërsa më pas janë stadiumet e Durrësit dhe Rrogozhinës të cilët janë më pranë kryeqytetit dhe do të ishin më të favorshëm për tifozerinë bardheblu.
Tirana kërkon që të ketë sa më shumë tifozë në mbështetje të skuadrës ndaj do të synojë të zgjidhë sa më parë këtë problem, për të mobilizuar më pas ata për t’i pasur pranë në duelin delikat.
