Disa muaj pas denoncimeve masive për erën e rëndë të ujit “Lajthiza”, problemi i kahershëm duket se është rishfaqur përsëri.
Këtë herë, një qytetar që jeton në New York të SHBA-ve ka ndarë shqetësimin e tij për këtë problem. Në një video të dërguar për JOQ, qytetari thotë se uji duket sikur është ujë përroi dhe jo një ujë burimi.
“Shpresoj që kjo video, t’u japë një mesazh të qartë atyre që e prodhojnë dhe atyre që e ambalazhojnë. Ne nuk jemi injorantë pavarësisht se jetojmë jashtë. E blejmë këtë ujë se në radhë të parë dimë se nga vjen ky ujë, jam atdhetar dhe dua të ndihmoj sadopak ata që nga veni im mundohen të përfitojnë nga ky skandal.
Ky ujë Lajthiza prodhohet nga një ujë i jashtëzakonshëm, shumë i mirë, ndaj dhe e blej përveç faktit se jam shqiptar. Por që të abuzohet në këtë lloj mënyre, që ne të pijmë ujë kanalesh, sepse po t’i hapësh kapakun këtij uji, ky kundërmon. Dhe as ujë përroi, aq më keq, një uji i pisët.
Uji i maleve nuk merr erë në asnjëlloj bidoni. Por le t’i shkojë ky mesazh atyre prodhuesve dhe ambalazhuesve të këtij uji, se është një turp që bëni me konsumatorët.”, thotë shqiptari ndër të tjera.
Disa muaj më parë, me dhjetra denoncime u bënë publike në media për cilësinë skandaloze të ujit “Lajthiza”, pasi qytetarët raportonin për një aromë të rëndë që kishte produkti. Asokohe, qytetarët vunë në mëdyshje faktin nëse do të vazhdonin të blinin më të njëjtin produkt, apo jo.
