Policia e Tiranës ka arrestuar një person, i cili akuzohet se iu dërgonte qytetarëve të ndryshëm në Shqipëri, link të rremë, për të plotësuar të dhënat bankare, duke u kamufluar si filiali i një banke të nivelit të dytë, me qëllim që t’iu merrte para nga llogaria
Në kuadër të operacionit të koduar “MISLEADING MESSAGES” është vënë në pranga shtetasi Adem Said, 23 vjeç, lindur dhe banues në Francë.
Autoritetet raportojnë se ai është kapur në një bankomat në Tiranë, duke tërhequr para nga një llogari që e kishte marrë nëpërmjet linkut. Sipas bluve të kryeqytetit, 23-vjeçari, pasi kishte hapur linkun në Francë dhe kishte mashtruar qindra qytetarë, kishte ardhur në Tiranë, me qëllim tërheqjen e parave nga llogaritë bankare që kishte përfituar nëpërmjet mashtrimit.
“Arrestimi i këtij shtetasi u krye pasi përmes mashtrimit me dërgimin e mesazheve të rreme në celularë, kërkonte plotësimin e formularëve me të dhëna bankare personale, të cilat më pas i përdorte për të tërhequr para nëpërmjet bankomateve (ATM) dhe aplikacioneve bankare të instaluara në celulare. Në këtë skemë mashtrimi kanë rënë viktimë qindra shtetas shqiptarë.
Në cilësinë e provës materiale u sekuestruan 3 celularë. Vijojnë hetimet për identifikimin dhe procedimin e shtetasve të tjerë të përfshirë në këtë veprimtari kriminale.” – raporton Policia.
Materialet procedurale i janë referuar Prokurorisë së Tiranës për veprat penale “Mashtrimi kompjuterik” dhe “Ndërhyrja në të dhënat kompjuterike”.
