Dje ju kishim treguar për ofertën e rëndësishme që kishte mbërritur nga Arabia Saudite në zyrat e Barcelonës për Raphinha.
Al Hilal, në fakt, dëshiron ta rrëmbejë brazilianin nga klubi katalanas me një ofertë marramendëse prej 100 milionë eurosh për kartonin e tij dhe kontratë 4-vjeçare prej 200 milionë eurosh për lojtarin, i cili këtë sezon ka realizuar 30 gola dhe ka dhënë 23 asistime në 49 paraqitje.
Vetë Raphinha, në një intervistë për “TNT Sports Brasil”, ka komentuar ofertën e marrë: “Jam informuar për ofertën nga Arabia Saudite dhe, sinqerisht, mbeta shumë i surprizuar, sepse komisionet ishin kaq të larta.
Nëse do të ma kishin bërë këtë ofertë vitin e kaluar, besoj se do të isha larguar nga Barcelona. Në atë kohë isha i shkatërruar mendërisht dhe kjo ofertë do ta kishte ndryshuar plotësisht jetën time, si dhe atë të gruas dhe familjes sime.
Kush thotë të kundërtën, gënjen. Është e pamundur të shohësh shifra të tilla dhe të mos mendosh që mund të të ndryshojnë jetën. Megjithatë, unë mendoj se kam ende shumë për të dhënë në Europë.
Mund të jap ende një kontribut të rëndësishëm në sukseset e Barcelonës, kjo më jep mundësinë të vazhdoj të përfaqësoj edhe kombëtaren. Kjo është ajo që ma frenoi joshjen ndaj parave dhe ma hapi më shumë rrugën drejt ëndrrave të mia”.
