Këtë të shtunë Partia Socialiste anuloi takimet elektorale për shkak të homazheve për Papa Franceskun, por burime nga selia rozë bëjnë me dije se Edi Rama ka mbledhur rreth paradites së sotme kandidatët për deputetë në një takim informal.
Mësohet se takimi është mbajtur në një ambient privat në Tiranë, teksa në fokus të diskutimit ka qenë përplasjet mes kandidatëve për vota persona.
Burime për mediat bëjnë me dije se Rama u ka dhënë porosi kandidatëve që kryesore në këto zgjedhje është numri 5 dhe se çdo konflikt i brendshëm mund të dëmtojë PS.
Mediat raportojnë se Rama ka kërkuar që çdo kandidat, ata që janë në listë të hapur të kërkojnë votën personal, por të mos shajnë kolegët e tyre brenda partisë te zgjedhësit, sepse sipas tij, në këtë mënyrë mund të pezmatojë votuesit dhe të penalizojë maksimizimin e votës për mazhorancën.
Gjithashtu, Rama u ka kërkuar socialistëve që të organizohen me kontaktet e tyre në diasporë për të bërë të mundur që shqiptarët jashtë vendit të votojnë, sidomos aty ku është përqendruar numri më i madh i tyre në Itali dhe Greqi.
Për shkak të problemeve që kanë hasur me postën në disa vende në këto dy shtete, Rama ka dhënë porosi që të mos demoralizohen votuesit jashtë por të binden që të shkojnë të marrin zarfet dhe të votojnë.
