Policia e Tiranës ka arrestuar një person, i cili akuzohet se ka ndihmuar për t’u larguar nga vendi i ngjarjes autorin, i cili dhunoi me sende të forta një faturiste të OSHEE-së.
Në pranga është vënë shtetasi J. S., 30 vjeç, banues në Tiranë i cili akuzohet për veprat penale “Përkrahja e autorit të krimit” dhe “Moskallëzim krimi”.
Sipas bluve të kryeqytetit, 30-vjeçari ka ndihmuar për t’u larguar nga vendi i ngjarjes 38-vjeçarin Spartak Cara, i cili është shpallur në kërkim, pasi akuzohet se ka dhunuar faturisten e OSHEE-së Rubena Hasa, e cila kishte shkuar për t’i lexuar sahatin e lokalit.
Njoftimi:
Ndihmoi autorin e ngjarjes së ndodhur ditën e sotme, të largohej nga vendi i ngjarjes, vihet në pranga 30-vjeçari.
Vijon puna për kapjen e 38-vjeçarit që goditi me sende të forta punonjësen e Oshee-s, në lokalin në posedim të tij, në rrugën “Artan Lenja”.
Sekuestrohet automjeti i 30-vjeçarit, me të cilin u largua autori.
Në vijim të veprimeve për ngjarjen e ndodhur ditën e sotme, në rrugën “Artan Lenja”, ku mbeti e dëmtuar me sende të forta shtetasja R. H., 37 vjeçe, specialistët për Hetimin e Krimeve të Komisariatit të Policisë Nr. 2 arrestuan në flagrancë shtetasin J. S., 30 vjeç, banues në Tiranë, për veprat penale “Përkrahja e autorit të krimit” dhe “Moskallëzim krimi”.
Nga hetimet ka rezultuar se ky shtetas ka ndihmuar autorin e ngjarjes, shtetasin S. C., 38 vjeç, të largohej nga vendi i ngjarjes.
Vijon puna intensive për kapjen dhe ndalimin e 38-vjeçarit.
Materialet i kaluan Prokurorisë, për veprime të mëtejshme procedurale.
