Biznesmeni Shkëlqim Fusha është paraqitur sot në ambientet e Prokurorisë së Posaçme Kundër Korrupsionit dhe Krimit të Organizuar (SPAK).
Fusha është shoqëruar nga avokati i tij, ndërsa ende nuk janë bërë publike arsyet e thirrjes apo natyra e hetimit për të cilin është thirrur.
Paraqitja e tij në SPAK vjen në një kohë kur institucioni ka intensifikuar hetimet ndaj zyrtarëve dhe biznesmenëve të lidhur me abuzimet me fondet publike.
Shkëlqim Fusha është pronari i kompanisë së ndërtimit ‘Fusha Shpk’, një kompani e lidhur ngushtësisht me punët publike gjatë periudhës së drejtimit të Bashkisë së Tiranës nga Erion Veliaj, përgjatë tri mandateve të tij.
Sipas SPAK, Veliaj ka firmosur një leje ndërtimi në fshatin Yrshek të Tiranës, e cila do të realizohej nga kompania ‘Fusha Shpk’ në pronësi të biznesmenit Shkëlqim Fusha. Në këtë rast del në skenë edhe një nga OJF-të e ngritura nga Ajola Xoxa, bashkëshortja e z. Veliaj.
Kjo OJF, sipas hetimeve, ka kryer transaksione të çuditshme bankare, të cilat SPAK i konsideron si përfitime të ardhura nga klientelizmi i bashkëshortit të saj me administratorin e kompanisë ‘Fusha Shpk’.
Nga dokumentacioni i administruar pranë Bashkisë së Tiranës rezulton se ‘Fusha Shpk’, me aksioner biznesmenin Shkëlqim Fusha, ka përfituar disa herë leje ndërtimi nga kjo bashki. Në një nga këto raste, Erion Veliaj ka firmosur një leje për ndërtimin e një shtëpie në Yrshek, që do të ndërtohej nga kompania ‘Fusha Shpk’.
Pas dhënies së lejes, kompania ‘Fusha Shpk’ ka transferuar një shumë të konsiderueshme parash në llogaritë bankare të dy avokateve, të cilat kanë lidhje të afërta me Ajola Xoxën. Këto avokate kanë kaluar gjysmën e shumës në llogarinë e organizatës ‘Harabel’.
Sipas SPAK, një pjesë e konsiderueshme e financimeve të kryera për qendrën ‘Harabel’ – e cila, siç u përmend, zotërohet nga Ajola Xoxa – kanë ardhur nga sponsorizime të subjekteve të lidhura në mënyrë të drejtpërdrejtë ose të tërthortë me Bashkinë e Tiranës. Këto fonde janë përdorur për të paguar qiratë e zonjës Xoxa, si edhe për likuidimin e faturave për shërbime të ofruara nga shoqëri të familjarëve të saj.
Hetimet thellohen më tej dhe zbulojnë se mënyra sesi janë bërë pagesat nga subjekte të caktuara në drejtim të qendrës ‘Harabel’ ngre dyshime të forta për një skemë të strukturuar klienteliste, e cila shtrihet përtej marrëdhënies mes Veliajt dhe kompanisë ‘Fusha’. Në shumë raste, pagesat e sponsorizimeve nuk janë deklaruar si të tilla, por janë realizuar përmes kontratave fiktive për shërbime që nuk rezultojnë të jenë kryer realisht.
Për këtë arsye, SPAK po heton nëse këto transaksione përbëjnë elementë të veprave penale të korrupsionit pasiv dhe aktiv, shpërdorimit të detyrës dhe pastrimit të produkteve të veprës penale. Të gjitha këto elemente, sipas organit të akuzës, përbëjnë një skemë të mirëorganizuar për përfitim financiar të paligjshëm në dëm të interesit publik.
