Një 27-vjeçar nga Berati është arrestuar në flagrancë pasi u kap me lëndë narkotike, armë dhe municion si në automjetin që po drejtonte, ashtu edhe në banesën e tij.
Gjatë një kontrolli të befasishëm në aksin rrugor “Berat-Dimal”, forcat e rendit zbuluan se i riu kishte me vete sasi të lëndës narkotike të dyshuar cannabis sativa. Kontrollet u zgjeruan edhe në banesën e tij në fshatin Roshnik, ku u gjetën dhe sekuestruan edhe një armë gjahu, municion luftarak dhe një pistoletë sportive.
Sipas hetimeve, dyshohet se 27-vjeçari me inicialet A.Z. shpërndante doza të kanabisit në qytet, aktivitet që zhvillohej në mënyrë të organizuar.
Të gjitha provat janë sekuestruar, ndërsa ndaj të riut kanë nisur procedurat ligjore për veprat penale përkatëse.
