Qytetarë të ndryshëm kanë ngritur shqetësimin se po marrin mesazhe të dyshimta në telefonat e tyre, të dërguara nga numra të panjohur. Përmbajtja e këtyre mesazheve pretendon se llogaria e tyre në “Raiffeisen Bank” është çaktivizuar për arsye sigurie, dhe i udhëzon ata që ta riaktivizojnë atë përmes një linku të dërguar.
Për shembull, një nga mesazhet e përhapura shkruan: “Raiffeisen: llogaria juaj është çaktivizuar për arsye sigurie. Ju lutemi riaktivizoni atë nëpërmjet: raiffisen-lidhje.com”.
Nga denoncimet e shumta që kanë mbërritur në redaksinë e JOQ, rezulton se këto mesazhe janë dërguar edhe tek persona që nuk kanë fare llogari në këtë bankë.
Një qytetar ka ndarë përvojën e tij ku shkruan:
“Pershendetje si jeni me erdhi nje mesazh ne telefon nga nje numer qe nuk e njihja ku thoshte: Raiffeisen: llogaria juaj eshte caktivizuar per arsye sigurie, ju lutemi riaktivizoni ate nepermjet: raiffisen-lidhje.com. Un skam hapur asnje llogari ne kete bank dhe kur hapa linkun dukej qart qe ishte nje scam. Per siguri postoje se nuk i dihet ndonje qe nuk merr vesh nga keto e perdor ate link. Gjithashtu opsioni regjistrohu tani nuk funksiononte”.
JOQ kontaktoi me operatorë të “Raiffeisen Bank”, të cilët konfirmuan se këto mesazhe janë të rreme dhe përbëjnë një tentativë mashtrimi. Banka thekson se nuk komunikon asnjëherë me klientët përmes numrave të panjohur apo linqeve të dyshimta, por vetëm përmes kanaleve zyrtare.
Qytetarëve të jenë të kujdesshëm dhe të mos hapin asnjë link të tillë, në mënyrë që të mbrojnë të dhënat e tyre personale nga abuzimi.
