Avokati dhe kandidati për deputet nga radhët e PD-ASHM, Altin Goxha ka paralajmëruar qytetarët e Tiranës, që të mos dorëzojnë në UKT dokumentat e pronave të tyre.
Gjatë një interviste në TVA News, Gjoxhaj tha se po vidhen të dhënat e pronës, pasi është një projekt nga Bashkia Tiranë për shembjen e çdo pallati apo ndërtese mbi 50-vjeçare, në mënyrë që këto të fudnit të kthehen në kulla shumë katëshe.
“Në çdo lagje të Tiranës, bashkë me faturën e ujit, qytetarëve po u vjen edhe një fletë ku kërkohet që ata të dorëzojnë dokumentet më të ndjeshme të pronësisë te UKT. Nuk ka asnjë bazë ligjore për këtë kërkesë. Këta ‘operatorë’ janë në fakt patronazhistë që mbledhin të dhëna për qëllime elektorale”, deklaroi Goxhaj gjatë intervistës.
Ai thekson se kërkesa për dorëzimin e dokumenteve si kontrata e shit-blerjes, certifikata e pronësisë apo aktet e trashëgimisë nuk ka mbështetje ligjore dhe është një ndërhyrje e rëndë në privatësinë e qytetarëve.
“Ato dokumente i ke vetëm ti, noteri dhe Kadastra. Bashkia nuk ka të drejtë të të kërkojë një gjë të tillë, aq më pak përmes UKT-së. Nëse i duan, të ndjekin rrugën ligjore. Nuk ja jep asnjë dokument patronazhistëve të ujësjellësit”, tha ai me tone të ashpra.
Avokati shtoi se ky është një skenar i organizuar nga Edi Rama, i cili, përveçse Kryeministër, mban edhe postin e Kryetarit të Bashkisë Tiranë, duke e cilësuar këtë veprim si një shkelje të rëndë të të drejtave të qytetarëve.
Ai iu bëri thirrje qytetarëve të ngrenë zërin, të mos bien pre e presioneve apo thirrjeve telefonike të operatorëve të terrenit dhe të kërkojnë shpjegim zyrtar nga Bashkia Tiranë:
Mbi çfarë ligji kërkohen këto dokumente?
Kush e ka dhënë këtë urdhër?
Çfarë ndodh me të dhënat pasi dorëzohen?
“Mos e bëni këtë gabim! Mos ua dorëzoni patronazhistëve dokumentet e pronësisë suaj! Ju keni të drejtë t’i ruani të dhënat tuaja dhe t’i mbani të sigurta”, përfundoi Goxhaj.
Ai paralajmëroi se kjo çështje do të ndiqet edhe në rrugë ligjore dhe do të jetë një nga temat kryesore të fushatës së tij.
