Përfaqësuesit e Ukrainës, Mbretërisë së Bashkuar, Francës dhe Shteteve të Bashkuara do të zhvillojnë negociata në Londër për një armëpushim të pakushtëzuar, pasuar nga vendosja e një paqeje reale dhe të qëndrueshme.
Këtë e ka bërë të ditur në Telegram presidenti ukrainas Volodymyr Zelensky.
“Kam folur me kryeministrin e Mbretërisë së Bashkuar, Keir Starmer. Një bisedë e mirë dhe e detajuar. Tashmë këtë të mërkurë, përfaqësuesit tanë do të punojnë në Londër. Ukraina, Mbretëria e Bashkuar, Franca dhe Shtetet e Bashkuara – ne jemi të gatshëm të ecim përpara sa më konstruktivisht të jetë e mundur, ashtu siç kemi bërë më parë, për të arritur një armëpushim pa kushte, të ndjekur nga vendosja e një paqeje të vërtetë dhe të qëndrueshme”, ka shkruar Zelensky.
Ai shprehu mirënjohjen për të gjithë partnerët që po ofrojnë mbështetje dhe theksoi se një armëpushim pa kushte duhet të jetë hapi i parë drejt paqes. Zelensky vuri në dukje se këtë Pashkë e bëri të qartë se janë veprimet e Rusisë që po e zgjasin luftën. Presidenti ukrainas gjithashtu njoftoi se ka diskutuar punën e përbashkët brenda formateve evropiane të sigurisë me Keir Starmer.
