Papa Françesku është shfaqur në publik këtë të dielë të Pashkës, duke thënë bekimin për mijëra besimtarë në sheshin Shën Pjetri në Vatikan.
Papa, 88 vjeç, doli në një karrige me rrota dhe bëri me dorë nga ballkoni i Bazilikës së Shën Pjetrit drejt turmave që brohorisnin poshtë.
Shfaqja e tij ishte pritur me padurim, pas daljes nga spitali muajin e kaluar, pas pesë javësh trajtimi për një infeksion që çoi në pneumoni të dyfishtë.
Në tekstin e Urbi et Orbi, të lexuar nga Imzot Diego Ravelli, Françesku nënvizonte se në sytë e Zotit “çdo jetë është e çmuar!
“Sa vullnet për të vdekur shohim çdo ditë në konfliktet e shumta që prekin pjesë të ndryshme të botës! Sa dhunë shohim shpesh edhe në familje, ndaj grave apo fëmijëve! Sa përbuzje ndihet ndonjëherë ndaj më të dobëtve, të margjinalizuarve, mërgimtarëve!
Do të doja që në këtë ditë t’i kthehemi shpresës dhe besimit te të tjerët, edhe tek ata që nuk janë afër nesh ose që vijnë nga vende të largëta me zakone, mënyra jetese, ide dhe zakone të ndryshme nga ato më të njohurat për ne, sepse të gjithë jemi fëmijë të Zotit”.
Më pas Papa kërkoi paqe në Tokën e Shenjtë. “Jam i shqetësuar për klimën në rritje të antisemitizmit që po përhapet në të gjithë botën. Në të njëjtën kohë, mendimet e mia shkojnë te njerëzit dhe në veçanti te komuniteti i krishterë i Gazës, ku konflikti i tmerrshëm vazhdon të gjenerojë vdekje dhe shkatërrim dhe të shkaktojë një situatë humanitare dramatike dhe të poshtër. Paqe!”, ka shkruar Papa në Urbi et Orbi të lexuar nga Imzot Diego Ravelli.
Papa u shpreh se “asnjë paqe nuk është e mundur pa çarmatim të vërtetë! Nevoja që çdo popull duhet të sigurojë për mbrojtjen e tij nuk mund të shndërrohet në një garë të përgjithshme armësh”.
