Mot i keq ka shkaktuar përmbytje të mëdha në shumë zona të Italisë. Shirat e rrëmbyeshëm sollën përmbytje, dëme, rrëshqitje dheu në veriperëndim, veçanërisht në Piemonte, ku një i moshuar humbi jetën në shtëpinë e tij në Monteu da Po në zonën e Torinos.
Sipas mediave italiane gjithashtu u gjetën trupat e dy personave të cilët rezultonin të zhdukur, babë e bir përkatësisht 65 vjeç dhe 34 vjeç të cilët përfunduan me makinën e tyre në një gropë.
Rrëshqitje dheu pati edhe në San Martino të Trentos. 14 persona u evakuuan ndërsa nuk raportohet për të lënduar.
Autoritetet kanë mbyllur disa rrugë për shkak të përmbytjeve. Moti i keq ka përfshirë edhe Toskanën.
Shiu dhe erërat e fuqishme shkaktuan probleme në trafikun rrugor dhe hekurudhor. Në Milano autoritetet mbyllën parqet për shkak të reshjeve të dendura.
Mbrojtja Civile ka lëshuar një alarm të kuq për tetë rajone përfshirë edhe zonat e Emilia Romagna dhe Lombardia si edhe e verdhë në Campania, Piemonte, Veneto, Liguria, Toscana dhe Valle d’Aosta. Moti i keq pritet të zgjasë edhe gjatë Pashkëve në qendër dhe veri të Italisë.
