Partizani është në fazën më delikate dhe duhet të bëjë një sforco të madhe për të arritur çfarë të mundet nga ky sezon.
Aktualisht të kuqtë po mbajnë vendin e katërt në renditje, që të çon në finalet e titullit kampion, teksa kanë fituar edhe ndeshjen e gjysmëfinalen e parë të Kupës së Shqipërisë kundër Egnatias dhe të kthimit e luajnë në shtëpi javën e ardhshme.
Pavarësisht se situata është në favor dhe të kuqtë kanë gjithçka në dorën e vet, vështirësia mbetet dhe Gega duhet të përballet edhe me mungesa të rëndësishme.
Agim Zeka nuk do të ketë mundësinë të japë kontributin e tij në këtë fund të sezonit. Sulmuesi pësoi një dëmtim në ndeshjen e fundit kundër Egnatias në kampionat dhe iu desh të linte fushën e blertë pa u plotësuar çerek ore lojë.
Zeka ka rezultuar me një tërheqje muskulore që do të kërkojë afro një muaj kohë për tu rikuperuar, çka do të thotë se lojtari nga Prishtina e ka mbyllur sezonin dhe nuk do të mund të kontribuojë në këto ndeshje të mbetura.
Me probleme në fitoren kundër Egnatias rezultoi të ishte edhe David Domgjoni, i cili fatmirësisht nuk ka diçka të rëndë dhe pritet të kthehet në harkun e disa ditëve.
Prizrenasi po përpiqet të jetë gati që me Bylisin, por duket e vështirë për shkak të rrezikut të një përshkallëzimi të dëmtimit. Problemet për Gegën në ndeshjen e radhës shtohen me mungesën e Kekos, që ka plotësuar numrin e 4 kartonëve dhe duhet ta ndjekë ndeshjen nga tribuna.
