Një ngjarje tragjike tronditi qytetin e Udines mëngjesin e së enjtes, ku një grua me origjinë tuniziane, Samia Bent Rejab Kedim, 46 vjeç, u gjet pa shenja jete në apartamentin e saj në katin e dytë të një ndërtese.
Trupi i saj kishte plagë të dukshme nga një mjet prerës, i cili nuk u gjet në vendngjarje.
Hetimet e para u përqendruan menjëherë te ish-bashkëshorti i viktimës, Mohamed Naceur Saadi, 59 vjeç, gjithashtu me kombësi tuniziane.
Ai ishte nën masën e arrestit shtëpiak në Monfalcone, por kishte marrë një leje të përkohshme për t’u larguar nga ora 09:00 deri në 11:00. Pikërisht në këtë interval kohor dyshohet se ka shkuar në banesën e ish-gruas dhe e ka sulmuar atë për vdekje.
Alarmi u dha nga banorë të pallatit, të shqetësuar nga britmat dhe zhurmat e forta që vinin nga apartamenti. Në momentin e ngjarjes, djali i mitur i çiftit nuk ndodhej në banesë.
Mohamed Saadi kishte një urdhër ndalimi për t’u afruar tek gruaja dhe mbante një byzylyk elektronik. Pajisja regjistroi një shkelje të kohës së kthimit në shtëpi, duke sinjalizuar automatikisht autoritetet.
Pas krimit, burri tentoi të largohej me makinë, por pak më vonë u përfshi në një aksident fatal në komunën e Basiliano, ku automjeti i tij u përplas me një kamion cisternë, aty ku Saadi humbi jetën në vend.
