Dy organet drejtuese kryesore të sportit në Shqipëri si Federata Shqiptare e Futbollit (FSHF) dhe Komiteti Olimpik Kombëtar Shqiptar (KOKSH) janë përplasur sërish në distancë para Asamblesë së 31-të të Përgjithshme të KOKSH-it.
Federata Shqiptare e Futbollit ka refuzuar pjesëmarrjen në këtë takim, i cili do të zhvillohet më 23 prill.
Shkak është bërë refuzimi nga ana e Komitetit Ekzekutiv të KOKSH-it për të përfshirë në rendin e ditës një kërkesë zyrtare të FSHF-së të paraqitur më 28 mars, shkruan organi drejtues i futbollit.
Sipas njoftimit zyrtar, kërkesa e FSHF-së kishte për qëllim shprehjen e qëndrimit të Asamblesë së Përgjithshme mbi zbatimin e vendimit përfundimtar të Gjykatës së Arbitrazhit për Sportin (CAS), i cili e ka shpallur të pavlefshëm vendimmarrjen e mëparshme të KOKSH-it.
Kjo vendimmarrje duhet të zbatohet detyrimisht nga KOKSH-i për ta kthyer strukturën Statutore të Komitetit Olimpik Kombëtar brenda kornizës së ligjit, vëren reagimi i FSHF-së.
Organi drejtues i futbollit shkruan se drejtuesit aktualë të KOKSH-it “kanë vendosur të injorojnë, jo vetëm vendimin e gjykatës sportive ndërkombëtare me prestigjioze si CAS, por edhe të drejtat themelore të një anëtari për të kërkuar përfshirjen e një çështjeje në rendin e ditës”.
“Nuk mund të ketë kuptim pjesëmarrja në një asamble kur anëtarët nuk lejohen të shprehen, nuk u njihet mundësia për të diskutuar çështje me karakter kaq të rëndësishëm dhe nuk u garantohen të drejtat e pjesëmarrjes. Në një organizatë ku një anëtar ka më pak të drejta sesa një drejtues i zgjedhur, atëherë vetë kuptimi i demokracisë institucionale është i cenuar”, vijon në përmbyllje reagimi i FSHF-së.
Federata garantoi se do të vazhdojë betejën e saj ligjore dhe institucionale për “të garantuar ligjshmërinë” dhe për “të rikthyer funksionimin normal dhe të rregullt” të KOKSH-it, duke përvijuar akuzat në distancë mes aktorëve kryesorë të sportit në vend.
