Drejtori i Ujësjellës-Kanalizimeve në Elbasan, Luan Tabaku është paraqitur paraditen e kësaj të mërkure në Prokurorinë e Posaçme (SPAK).
Ai pritet të merret në pyetje në lidhje me hetimet që SPAK po kryen mbi disa prokurime publike në Elbasan, ku fituesi dyshohet se ka qenë i paracaktuar dhe paratë publike kanë shkuar tek personazhet e krimit të organizuar, përmes personave të tretë.
Në orët e para të mëngjesit të së enjtes, Luan Tabakut iu ushtrua kontroll me vendim GJKKO-je edhe në banesë, nga oficerët e BKH-së dhe Policisë. Në total ishin lëshuar urdhër-kontrolle për në 4 banesa dhe në një zyrë.
Kontrolle u ushtruan tek Nazif Bajrami, një biznesmen i njohur fushën e ndërtimit në Elbasan, i cili ka fituar një sërë tenderash nga institucionet publike, si dhe tek Marenglen Çoku, administrator i ekipit të Futbollit të A. F. Elbasanit.
Nga zbërthimi i bisedave në aplikacionin e enkriptuar “Sky Ecc”, ata kanë rezultuar të lidhur me grupin kriminal të drejtuar nga Suel Çela, ku ky i fundit vijon të jetë ende në kërkim nga SPAK.
