Gabriel Këputa denoncon në redaksinë e emisionit “Stop” shokun e tij Olti Klosi, të cilit në vitin 2015 i la makinën “Mercedens S Class” me vlerë 43 mijë euro për disa javë, derisa të kthehej nga Belgjika, ku jetonte prej 33 vjetësh.
Pasi u kthye Olti fillimisht iu shmang e më pas i tha, se makinën ia kishte lënë peng për 12 mijë Saimir Halilit.
“Në vitin 2015 unë nisem për në Belgjikë dhe i lë një shokut tim i lë makinën time tip “Mercedens S Class”. Në atë moment unë nisem për në aeroport dhe i them shokut tim merre makinën mbaje dhe në atë moment që unë do të kthehem do ma japësh përsëri. Sa për të mos e lënë nëpër pakinget e aeroportit. Vlera e makinës në atë kohë ka qenë 43 mijë euro. Kthehem nga Belgjika i bëj telefon i them a po del në aeroport që të më marrësh dhe nuk më del. I them hajde se po vij, shkoj e takoj dhe më shmanget. Pas 3-4 ditësh mezi e takoj edhe i them që të më sillte makinën dhe më gjente lloj-lloj mënyrash. Saqë erdhi momenti që e pyeta dhe më tha që makinën e kam shitur. Makinën ia kishte shitur një personi tjetër, shitje në të zezë. Punë borxhe, më thanë që personi që ia kishte blerë ia kishte blerë për 15 mijë euro. E takova personin dhe më tha më vjen shumë keq unë ty nuk të njoh fare, këtë makinën e kam blerë. Në këto momente që po flasim makina është ende në emrin tim dhe letrat e pronësisë i kam unë. Nuk e di se si e ka blerë pa dokumente.”
Gabrieli bën denoncim dhe çështja shkon në Prokurori në dorë të prokurorit Bilbil Mete. Ky i fundit bllokoi makinën për llogari të denoncuesit, por në ruajtje ia la blerësit, që e kishte marrë ilegalisht Saimir Halili.
“Unë shkova bëra një denoncim në vitin 2015, makina vjen bllokohet nga policia. Çështja shkon në prokurori dhe i them prokurorit që dua takim dhe prokurori Bilbil Mete nuk më jep asnjë lloj takimi. E takova dhe më tha ‘e di që ne të njohim shumë mirë ty, ti je një rrugaç i Belgjikës, po hajde se me ty do merremi shumë mirë’. E pyeta për makinën se si do të bëhet dhe më tha që nuk ke për të marrë asnjëherë makinë sa të jem unë prokuror.”
Gjyqtari Ervin Pollozhani i dha të drejtë Gabrielit, duke dalë me vendimin që ky automjet t’i kthehej të zotit në vitin 2016. Vendimi mori formë të prerë dhe iu përcoll Përmbarimit Shtetëror të Tiranës.
Përmbaruesi i ka bllokuar llogarinë debitorit dhe një automjet tjetër në pronësi të tij, por “Mercedezin” nuk e ka gjetur dot.
Ai ka kërkuar nga policia, që ta bllokojë mjetin duke e nxjerrë në sistemin “Alert”. Por policia nuk ka reaguar dhe mjeti ka vijuar të marrë gjoba në Tiranë, në shumën rreth 5 milionë lekë të vjetra edhe pse duhej bllokuar, pasi kishte dalë në “Alert”.
