Shtatë turistë të rinj spanjollë janë shpëtuar pas një incidenti të ndodhur rreth 100 m nën kanionin e Peshturës, në jug të Shqipërisë. Të gjithë ndodhen në gjendje të mirë shëndetësore.
Tre prej turistëve kishin dëmtuar litarin gjatë zbritjes në një ujëvarë të vogël në pjesën e poshtme të kanionit, gjë që ua bëri të pamundur ngjitjen pa pajisje speciale.
Në operacionin e shpëtimit kanë marrë pjesë forcat zjarrfikëse dhe ato policore të Tepelenës dhe Gjirokastrës, të cilat kanë ndërhyrë në kohë për të ndihmuar të rinjtë.
Turistët spanjollë ishin duke eksploruar zonën pa një guidë të licencuar, duke rritur rrezikun në terrene të vështira si ai i kanioneve.
Eksplorime të pasigurta në kanionet e Nivicës dhe Langaricës kanë sjellë më parë situata të ngjashme, duke ngritur shqetësime për sigurinë e turistëve dhe nevojën për orientim profesional në zona të rrezikshme natyrore.
