Seanca konstituive e Kuvendit të Kosovës u ndërpre ditën e sotme pas situatës së krijuar me mosvotimin e raportit për konfirmimin e mandatave.
Në një reagim pas dështimit të seancës, Albin Kurti i cili dorëzoi edhe dorëheqjen nga posti i Kryeministrit, tha se deputët e opozitës PDK, LDK, Lista Serbe dhe AAK sot votuan kundër raportit të komisionit për verifikimin e mandateve.
Kurti shprehet se ishte fakt i ditur që ata janë kundër qeverisë e Republikës, por se “janë edhe kundër vetvetes, këtë e mësuam sot”.
Reagimi i plotë:
Deputët e opozitës PDK, LDK, Lista Serbe dhe AAK sot votuan kundër raportit të komisionit për verifikimin e mandateve. Në një votim krejt formal e teknik që bazohet në dokumentacionin e KQZ-së, ata u rebeluan kundër betimit të deputetëve dhe konstituimit të legjislaturës së nëntë. Ky është sulm brenda institucional kundër Republikës së Kosovës dhe zgjedhjeve demokratike. Kjo është situatë e paparë në shtetin tonë e shumë më gjerë. Ne qeverisim mbarë e mirë, këta lanë nam e bëjnë lajm të keq për shtetin tonë. Se janë kundër qeverisë e Republikës dihet, por se janë edhe kundër vetvetes, këtë e mësuam sot.
