Europol ka bërë të ditur çmontimin e katër rrjeteve të mëdha kriminale që kanë nxitur fluksin e drogës në Bashkimin Evropian dhe Turqi, pas një hetimi të gjerë ndërkombëtar të koduar si “Operacioni Bulut”. Aksioni përfshiu autoritetet në Belgjikë, Francë, Gjermani, Holandë dhe Spanjë dhe u finalizua me një seri bastisjesh të koordinuara që çuan në arrestimin e 232 të dyshuarve, përfshirë edhe objektiva me rrezik të lartë.
Sipas agjencisë së BE-së për zbatimin e ligjit, grupet kriminale ishin përgjegjëse për kontrabandimin e të paktën 21 ton drogë në Evropë dhe Turqi, përfshirë 3.3 milionë tableta MDMA. Hetimi ka zbuluar gjithashtu përfshirjen e tyre në pastrim parash, krime të dhunshme dhe aktivitete të tjera të krimit të organizuar.
Europol theksoi se rrjetet kishin përdorur si rrugë tradicionale të kontrabandës, ashtu edhe struktura logjistike të sofistikuara për shpërndarjen e narkotikëve. Një rol kyç në operacion kishte përdorimi i platformave të koduara të komunikimit si Sky ECC dhe ANOM, që ndihmuan hetuesit në ndjekjen dhe çmontimin e rrjeteve.
Gjatë dy viteve të fundit, Europol ka koordinuar përpjekjet mes agjencive ligjzbatuese në të gjithë Evropën, duke pritur takime të nivelit të lartë dhe duke lehtësuar shkëmbimin e informacionit për të hartuar strukturat e rrjeteve kriminale dhe lidhjet me raste të tjera.
Megjithatë, sfidat mbeten të mëdha. Eurodeputeti italian Sandro Ruotolo, pjesë e një delegacioni parlamentar që vizitoi portet e Antwerpen dhe Roterdamit — dy nga pikat kryesore të hyrjes së drogës në BE — paralajmëroi se “lufta kundër trafikut të drogës është një lojë mace me miun”.
Ai ngriti shqetësimin se, ndonëse skanerët mund të zbulojnë drogë të fshehur në fruta, kontrabandistët kanë zhvilluar teknika më të sofistikuara si fshehja në tekstile, që i vështirësojnë zbulimin. “Ne e dimë sasinë e drogës që po kapet, por sa po kalon në të vërtetë?”, pyeti ai./ Euronews
