Drejtuesi i koalicionit “Nisma-Shqipëria Bëhet”, Adriatik Lapaj pranoi se është ndjerë i bullizuar dhe i kërcënuar nga kryeministri Edi Rama, teksa zbuloi edhe format përmes së cilave është intimiduar nga njerëz sipas tij të lidhur me mazhorancën.
Lapaj e lidhi argumentin e tij me etiketimet që Rama i ka bërë indirekt përmes rubrikës “Sy m’Sy”. Ai tha se ka frikë nga sjellja e kryeministrit, pasi mesazhet që ai përçon gjatë fushatës, i përkthen enturazhi i tij brenda strukturave të shtetit, por edhe bandave pranë PS si thirrje për të goditur rivalët politikë.
“Kryeministri i një vendi është autoritet nuk është një 63-64 vjeçar te çepi i lagjes që pi fërnet për qejfin e vetë dhe thotë një mendim. Është shteti. Ndihem i bullizuar dhe i kërcënuar, edhe që kam frikë se ai është njeriu që drejton 10500 policë. Ajo përkthehet në një mesazh të shtuar te militantët e vetë brenda strukturave të shtetit që goditeni këtë djalin. Inspektorët e policisë, anëtarët e krimit të organizuar që bashkëpunojnë me të”, tha Lapaj.
I pyetur se cilat janë kërcënimet që ka marrë pasi Rama e shigjetoi, Lapaj tha: “Në çdo drejtim. Çdo ditë. Të të gjitha llojeve dhe formave, baltë edhe sulm në çdo anë.”
Më tej, Lapaj theksoi se ai dhe bashkëpunëtorët e tij nuk do ta ndalin rrugën që kanë nisur, pavarësisht sulmeve që pretendon se janë bërë në drejtim të tyre.
“Nuk e kam problem fare se e kam ndarë mendjen, por dua të them ai nuk është një njeri i zakonshëm. Është kryeministri i një vendi dhe kur ai flet, gjithë enturazhi i tij merr mesazhe indirekt. Po nuk pyes unë fare për ato. Të të gjitha llojeve, të të gjitha grupeve rreth tij. Nga njerëz me uniformë të shtetit e deri te kriminelë ordinerë të rrugës që nuk i kam fare në llogari, por nuk ka kthim pas kjo rrugë. Nuk ka kthim pas. Në mos unë drejtpërdrejtë, njerëz rreth meje, bashkëpunëtorë. Por s’ka rëndësi, rëndësi ka që ne nuk kthehemi pas”, u shpreh Lapaj në A2 CNN.
