Administrata e presidentit amerikan Donald Trump ka përjashtuar telefonat inteligjentë, kompjuterët dhe një sërë pajisjesh elektronike nga tarifat e reja doganore, përfshirë edhe taksat e larta prej 125% të vendosura ndaj importeve kineze.
Vendimi u bë i ditur të premten në mbrëmje nga Doganat dhe Patrulla Kufitare e SHBA, e cila sqaroi se këto mallra nuk do të përfshihen as në tarifën globale prej 10% për shumicën e vendeve dhe as në taksat më të rënda për Kinën.
Masa vjen si reagim ndaj shqetësimeve të kompanive amerikane të teknologjisë, të cilat paralajmëruan për rritje të ndjeshme të çmimeve për konsumatorët, pasi pjesa më e madhe e pajisjeve prodhohet në Kinë. Përveç smartfonëve dhe kompjuterëve, përjashtimet përfshijnë gjithashtu përbërës të rëndësishëm si gjysmëpërçuesit, qelizat diellore dhe kartat e kujtesës.
Sipas disa vlerësimeve, çmimet e iPhone dhe pajisjeve të tjera elektronike do të ishin trefishuar nëse kompanitë do t’i kalonin konsumatorëve kostot e reja të tarifave. SHBA mbetet tregu kryesor për Apple, e cila realizoi më shumë se gjysmën e shitjeve të saj të smartfonëve atje gjatë vitit të kaluar. Counterpoint Research raporton se rreth 80% e iPhone-ve të destinuar për tregun amerikan prodhohen në Kinë, ndërsa pjesa tjetër vjen nga India.
Në përpjekje për të ulur varësinë nga Kina, Apple dhe kompani të tjera si Samsung po zhvendosin gjithnjë e më shumë kapacitete prodhuese në Indi dhe Vietnam. Në prag të hyrjes në fuqi të tarifave, Apple thuhet se ka shtuar prodhimin në Indi për të zbutur ndikimin e masave të reja.
Ndërkohë, Trump pati paralajmëruar një valë të re tarifash për shumë vende, por në një kthesë të papritur, ai njoftoi të mërkurën se do të aplikojë një pauzë 90-ditore për ato vende që nuk janë hakmarrë me tarifa të veta ndaj SHBA, duke i ulur përkohësisht në një tarifë të përgjithshme prej 10%. Përjashtim bën Kina, ndaj së cilës tarifat u rritën në 145%, në përgjigje të masave të saj hakmarrëse me taksa prej 84% ndaj mallrave amerikane.
Shtëpia e Bardhë e ka përshkruar këtë manovër si një taktikë negociuese për të përfituar kushte më të favorshme në tregtinë ndërkombëtare. Trump ka theksuar se tarifat e tij synojnë të korrigjojnë padrejtësitë në sistemin global të tregtisë dhe të rikthejnë vendet e punës në SHBA./ BBC
