Këtë të shtunë, koalicioni ‘Nisma Shqipëria Bëhet’ ka çelur zyrtarisht fushatën elektorale, ku Adriatik Lapaj, gjatë fjalës së tij ka prezantuar programin, duke thënë se do të rijetësojnë ekonominë.
Lapaj theksoi se 11 maji është dita e ndryshimit, një mundësi për të sjellë një të ardhme më të mirë për Shqipërinë. Ai u bëri thirrje qytetarëve, veçanërisht rinisë, që të bëjnë një zgjedhje të rëndësishme për të shpëtuar vendin nga dështimet e klasës politike aktuale.
“Në 12 maj, mendojeni mirë,” tha Lapaj, “nëse klasa politike do të mbetet siç është sot, shumë të rinj dhe familjarë që ende kanë dilema, do të bindën se ky vend nuk bëhet dhe do të largohen për të kërkuar mundësi jashtë vendit“, tha ai.
Më tej Lapaj tha se do të heqin DIVA-n nëse do të vijnë në pushtet dhe në Shqipëri do të ketë vetëm një taksë, atë të sheshtën 10%.
“Pensionistët e këtij vendi pas këtyre zgjedhjeve pension nën 200 euro nuk do të kenë. Programi ynë parashikon minimum jetik dhe pagesë invaliditeti 200 euro.
Kemi një plan të qartë për ri jetësimin ekonomik të Shqipëri, ndër të cilat janë politikat fiskale. Ne do të heqim DIVA-n. Në Republikën e Shqipërisë do të ketë vetëm një taksë të sheshtë 10%.
Të gjitha ata që bëjnë xhiro vjetore deri në 200 milionë lekë, tatimin mbi fitimin do ta kenë zero. Duam që familja të vetëpunësohet. Nuk mund të ketë vend të pasur me njerëz të varfër. Të pasurojmë popullin, të pasurojmë republikën“, tha Lapaj.
