Norvegjia po ndërton tunelin më të gjatë dhe më të thellë nënujor në botë, një projekt gjigand që pritet të revolucionarizojë infrastrukturën e vendit dhe të fuqizojë lidhjet rajonale përgjatë bregdetit perëndimor. Tuneli Rogfast – ose “Lidhja fikse Rogaland” – do të shtrihet 26.7 kilometra nën det dhe do të arrijë një thellësi prej 390 metrash nën nivelin e detit kur të përfundojë në vitin 2033.
Rogfast do të lidhë qytetet Stavanger dhe Bergen, dy ndër qytetet më të mëdha të Norvegjisë, duke ulur kohën e udhëtimit me 40 minuta. Kjo arterie e re rrugore është pjesë e autostradës panevropiane E39 dhe pritet të zëvendësojë disa nga kalimet me traget, duke e bërë udhëtimin më të shpejtë, më të sigurt dhe më efikas për banorët, punëtorët dhe turistët.
Një rrethrrotullim nën ishullin Kvitsoy
Në zemër të këtij projekti qëndron një nga zgjidhjet më unike të inxhinierisë: dy rrethrrotullime të ndërtuara 260 metra nën nivelin e detit, nën ishullin Kvitsøy – komuna më e vogël në Norvegji. Këto nyje nënujore do të shërbejnë si pika lidhjeje midis rrugëve që kalojnë nëpër dy tuba të ndarë të tunelit me nga dy korsi secili.
“Nëse ndodh një incident dhe ne duhet të mbyllim një pjesë të tunelit, trafiku do të mund të drejtohet përmes njërit tub,” tha Oddvar Kaarmo, menaxher i projektit Rogfast pranë Administratës Norvegjeze të Rrugëve. “Kemi dyer të gjelbra emergjence, sistem kamerash dhe çdo gjë është projektuar për siguri maksimale.”
Një projekt gjigand në zemër të shkëmbit nordik
Ndryshe nga projektet si lidhja Fehmarn midis Gjermanisë dhe Danimarkës që përdorin metoda modulare, Rogfast po ndërtohet përmes shpimit dhe shpërthimit direkt në shkëmb të fortë. Kjo metodë, e preferuar në Norvegji, garanton qëndrueshmëri dhe siguri maksimale në thellësi ekstreme nën ujë.
Aktualisht, projekti është afërsisht gjysmë i përfunduar. Në veri janë ndërtuar rreth 65% e tunelit, ndërsa në jug, në zonën e Randaberg, progresi ka arritur 45%. Kostoja e përgjithshme pritet të arrijë në 25 miliardë krone norvegjeze (rreth 2 miliardë euro).
“Norvegjia është lidere në ndërtimin e tuneleve nënujorë,” theksoi Kaarmo. “Ne kemi rreth 40 të tillë në vend dhe për ne është shpesh më e lehtë dhe më e lirë të ndërtojmë një tunel se sa një urë për të lidhur ishujt.”
Rogfast: një arterie e re për ekonomi, turizëm dhe komunitete
Tuneli pritet të ketë një ndikim të madh në ekonominë rajonale. Ai do të ndihmojë transportin e prodhimeve të detit drejt tregjeve ndërkombëtare, do të lehtësojë lëvizjen e punonjësve dhe pritet të rrisë ndjeshëm turizmin në zonat si Bergen dhe fjordet përreth.
“Kur ky projekt të jetë gati, ai nuk do të jetë thjesht një tunel. Do të jetë një lidhje jetike për njerëzit, bizneset dhe të ardhmen e këtij rajoni,” shtoi Kaarmo.
Sipas parashikimeve, deri në vitin 2053, nëpër Rogfast do të qarkullojnë rreth 13,000 automjete në ditë – një tregues i qartë i rëndësisë së kësaj vepre për të ardhmen e infrastrukturës evropiane.
