Komisioni i Disiplinës në FSHF ka bërë sot publike vendimet për të gjithë shkeljet e konstatuara gjatë fundjavës në kategoritë e futbollit në vend.
Për sjellje të gabuar të tifozëve, Tirana dhe Partizani janë gjobitur me nga 50 mijë lekë. Gjithashtu pati gjobë edhe për Egnatian dhe Elbasanin në Superiore.
Ndërkohë me shumë interes pritej vendimi për sfidën Flamurtari-Besa ndeshje në të cilën shpërtheu dhuna në fundin e takimit të mbyllur 1-2 në favor të kavajasve.
Tifozët vlonjatë pushtuan fushën duke u konfrontuar fizikisht me trajnerin kundërshtar, Emiljano Çela. Ndaj tij madje u hodh dhe karrige duke shënuar incidentin e radhës të rëndë në futbollin shqiptar.
Megjithatë FSHF nuk ka dhënë dënim maksimal për vlonjatët me këta të fundit që ia kanë hedhur me një gjobë (300.000 lekë), ndërsa për pjesën e mbetur të sezonit (2 ndeshjet e fundit) skuadra do t’i luajë pa praninë e tifozëve.
Kujtojmë që incidente të tilla në të kaluarën janë ndëshkuar edhe me heqje pikësh për skuadrën pritëse një formë kjo për të dënuar dhunën në futboll dhe mund të themi që Flamurtari ia hedhur paq duke vijuar garën për të siguruar një vend në Superligë.
Vendimet e Komisionit të Disiplinës:
KF Tirana, urdhërohet të dëmshpërblejë dëmet e shkaktuara në stadiumin “Arena Kombëtare” sipas akt konstatimit, brenda 15 ditëve.
FK Partizani, për sjellje të gabuar të spektatorëve, duke ndezur flakadanë dhe duke përdorur kore fyese ndaj ekipit kundërshtar, në bazë të neneve 17/2/c dhe 17/2/e të KDE, dënohet me gjobë në masën 50.000 (pesëdhjetë mijë) lekë.
FK Partizani, urdhërohet të dëmshpërblejë dëmet e shkaktuara në stadiumin “Arena Kombëtare” sipas akt konstatimit, brenda 15 ditëve.
KF Egnatia, për sjellje të gabuar të spektatorëve, duke ndezur flakadanë dhe duke përdorur kore fyese ndaj ekipit kundërshtar, në bazë të neneve 17/2/c dhe 17/2/e të KDE, dënohet me gjobë në masën 50.000 (pesëdhjetë mijë) lekë.
AF Elbasani, për sjellje të gabuar të spektatorëve, duke ndezur flakadanë dhe duke përdorur kore fyese ndaj ekipit kundërshtar, në bazë të neneve 17/2/c dhe 17/2/e të KDE, dënohet me gjobë në masën 50.000 (pesëdhjetë mijë) lekë.
AF Elbasani, urdhërohet të dëmshpërblejë dëmet e shkaktuara në Stadiumin “Arena Egnatia” sipas akt konstatimit, brenda 15 ditëve.
Flamurtari FC, për sjellje të gabuar të spektatorëve, duke hedhur sende në fushën e lojës dhe duke mos garantuar sigurinë e lojtarëve dhe zyrtarëve të ekipit kundërshtar, në bazë të neneve 6/3/b, 8/1, 17/1, 17/2/a, 17/2/b dhe 17/2/h të KDE, dënohet me gjobë në masën 300.000 (treqind mijë) lekë dhe zhvillimin e 2 (dy) ndeshjeve pa spektatorë. Sipas nenit 76/1/a të KDE, gjoba të aplikohet në masën 50%.
Flamurtari FC, urdhërohet të dëmshpërblejë dëmet e shkaktuara në pajisjet e sistemit VAR sipas akt konstatimit, brenda 15 ditëve.
