Lufta e Ftohtë nuk ka mbaruar akoma. Kjo vihet re tek shkëmbimi i të burgosurve midis Shteteve të Bashkuara dhe Rusisë.
Moska liroi një punonjëse të inteligjencës amerikane nga Los Anxhelos e cila u dënua fillimisht me 12 vjet burg për spiunazh në dobi të Ukrainës, në këmbim të një personazhi gjermano-rus të akuzuar për krijimin e një rrjeti global kontrabande të pajisjeve elektronike për ushtrinë ruse.
Shkëmbimi, i cili u zhvillua në aeroportin e Abu Dhabit, u konfirmua nga Agjencia Qendrore e Inteligjencës e SHBA-së dhe Shërbimi Federal i Sigurisë i Rusisë.
Pamjet në mediat shtetërore ruse treguan Ksenia Karelina, shtetase ruso-amerikane, e cila u shpall fajtore vitin e kaluar për tradhti nga një gjykatë ruse për dhurimin e parave për bamirësi ndaj një organizate me bazë në SHBA që ofron mbështetje humanitare për Ukrainën.
Ndërsa Arthur Petrov i arrestuar në vitin 2023 në Qipro me kërkesë të SHBA-së për gjoja eksportimin e mikroelektronikës së ndjeshme, u shfaq duke hyrë në një aeroplan rus nga pista në Abu Dhabi dhe duke iu nënshtruar kontrolleve mjekësore.
Wall Street Journal, e cila raportoi për herë të parë shkëmbimin, tha se marrëveshja u negociua nga drejtori i CIA-s, John Ratcliffe dhe një zyrtar i lartë i paidentifikuar i inteligjencës ruse. Ratcliffe ka folur si me shefin e FSB-së, Alexander Bortnikov, ashtu edhe me drejtorin e Shërbimit të Inteligjencës së Jashtme (SVR) Sergei Naryshkin muajt e fundit.
Sekretari amerikan i Shtetit, Marco Rubio, tha se Karelina po kthehej në shtëpi. Avokati i saj e konfirmoi këtë për Reuters. Përfaqësuesit për Shtëpinë e Bardhë dhe Departamentin e Shtetit të SHBA-së nuk mund të kontaktoheshin menjëherë për komente të mëtejshme mbi shkëmbimin.
