Pesë lojtarë do t’i mungojnë Tiranës ndaj Skënderbeut, ndërsa problemi kryesor është Emanuel Ernest.
Lojtari do të bëjë sot rezonancën magnetike dhe rrezikon të mos jetë në transfertën e së shtunës. Futbollistit i është lidhur shpatulla dhe ai ka dhimbje. Mjekët e Tiranës do të vlerësojnë gjendjen e tij pas goditjes në derbi, si dhe pasi të marrin përgjigjen e rezonancës dhe në fund do të dalin me një konkluzion.
Nëse nuk ka dëmtime fizike në shpatull, lojtari do të luajë me gjilpëra. Në të kundërt, ai humbet takimin me Skënderbeun. Veç Ernest, Tirana do të ketë edhe mungesa të tjera.
Bëhet fjalë për Ismajlin, Abah, Markun dhe Metën të dëmtuar. Rafael i pezulluar prej kartonëve, kthehet në Korçë. Dihet tashmë që te Tirana, për punë pezullimi, rrezikojnë, Meta, Prengaj, Selmani dhe Smaçi.
Me Ernest jashtë, Tirana pritet të gjejë zgjidhjen brenda skuadrës. Kështu, në ekip kthehet Rafael, ndërsa Smaçi ulet në stol. Nga ana tjetër, në vend të Ernest mund të luajë një prej dyshes Prengaj-Gjumsi.
Pjesa tjetër e skuadrës është e njëjtë si në takimet e tjera. Selmani e nis nga porta, më pas Kola, Dembele, Mici. Në mesfushë, Vera, Soler, Rafael dhe Përgjoni.
Në sulm Ernest, Jarmouni në qendër dhe më pas Ndreca. Në mungesë të Ernest mund të luajë njëri nga Prengaj, Gjumsi. Kujtojmë që Tirana këtë sezon nuk ka mundur dot të fitojë në Korçë.
