Në vigjilje të ndeshjes mes Tiranës dhe Partizanit, Bledi Shkëmbi u shfaq përpara gazetarëve me një thirrje për tifozët, të cilët i ftoi që të mbështesin ekipin në këtë moment të vështirë, edhe pse i mirëkuptoi për kontestimin e vazhdueshëm të tyre ndaj skuadrës.
“Tifozët i kuptoj fare mirë, sepse nuk janë mësuar që të mbështesin Tiranën në këto pozita ku ndodhet në sezon të vështirë që po kalon. E di shumë mirë që nuk janë mësuar të mbështesin ekipin në synimin që ka për të mbijetuar, por në fund u them se Tirana është e tyre. Ne në klub nuk jemi të përhershëm, por Tirana po”, tha trajneri i bardhebluve.
I pyetur mbi përgatitjen e këtij takimi, Bledi Shkëmbi ishte i prerë dhe u kujtoi të gjithëve se Tirana e tij gjithmonë ka luajtur për të fituar.
“Skuadra jonë edhe pse ka shumë barazime kurrë nuk është futur në fushë për një pikë. Të njëjtën gjë do të bëjmë edhe me Partizanin. Madje për këtë ndeshje edhe situata në klasifikim na detyron për të luajtur për fitore”, tha trajneri korçar.
Shkëmbi përfitoi të bënte edhe një bilanc për sezonin që po mbyllet dhe la të kuptohej se bardheblutë ishin në të tilla situata edhe prej fajit të tyre.
“Në shumë ndeshje kemi hedhur tutje avantazhin e krijuar. Kemi pësuar gola të lehtë duke hedhur tutje mundin tonë. Në këtë pikë them se faji është vetëm yni”, pohoi Shkëmbi.
