Nga Irma Marku
Kanë kaluar muaj që Edi Rama është tretur në pyllin e frikës së vet. Nuk është më një lider politik – është kthyer në një siluetë të deformuar, që endet nëpër kënetën që vetë ka hapur. Çdo dalje publike është një shpërthim paniku, një tjetër provë se njeriu që dikur manipulonte me fjalën, sot nuk arrin të kontrollojë dot as mendimet e veta.
Prej kohësh, në fjalorin e tij zhurmëfolës janë futur një familje fjalësh që të kujtojnë halucinacione frojdiane: kënetë, bataqe, llumra, zhaba, zhapinj, minj, buburrecë, ameba, paramecë. Është si të shohësh një shpirt të fundosur, që kërkon të marrë frymë nëpërmjet përfytyrimeve të tmerrit. Ata që e kanë ndjekur nga afër, e kuptojnë: organet e tij politike vitale janë shkatërruar. E vetmja gjë që funksionon është e folura – por edhe ajo është kthyer në të vjella verbale që mbulojnë dynjanë.
Shpëtojeni Ramën!
Sepse nuk po ia del më të mashtrojë as veten.
Sepse nuk i beson më askujt – as pasqyrës.
Sepse po flet me hijet dhe lufton me përbindësha që i ka shpikur vetë.
Shpëtojeni, sepse është vetëm. Më i vetmuar se kurrë.
Dhe, të vetmit që i kanë mbetur janë burokratët e korruptuar, mercenarët e propagandës dhe vartësit që i druhen ditës kur ai do të shembet.
Shpëtojeni Ramën!
Sepse ky vend nuk mund të drejtohet më nga një njeri që qeveris në panik.
Sepse çdo ditë që ai rri në pushtet, Shqipëria zvarritet më thellë në llumin që ai e quan art.
Sepse ai ka nevojë për një pushim të gjatë nga pushteti – ndoshta për të parë një psikiatër, ndoshta për të përballuar vetminë, ndoshta thjesht për të heshtur.
Shpëtojeni Ramën!
Jo më nga populli, por nga vetja.
Shpëtojeni nga barra e rëndë e detyrës që nuk e mban dot më.
Shpëtojeni nga titulli që e mbyt, nga pushteti që po e çmend, nga fjalët që nuk e ndjekin më.
Shpëtimi vjen përmes shkarkimit.
Që të dalë nga llumi thithës i kënetës që hapi vetë, ai duhet të shkarkohet me VOTË.
Vetëm vota e lirë mund ta çlirojë Shqipërinë nga ky teatër delirant. Vetëm vota e lirë mund ta shpëtojë Ramën.
Shpëtimi vjen përmes shkarkimit.
Ky njeri nuk do të ikë vetë – As do të përmirësohet – As do të ndalet. Çdo ditë që ai rri në karrige, e thellon edhe më shumë krizën mendore të pushtetit dhe krizën morale të shtetit.
Për të dalë nga llumi thithës që e hapi vetë, Rama duhet të shkarkohet me VOTË.
Me një votë që nuk është më vetëm akt qytetar, por mjet shpëtimi kombëtar.
Shpëtojeni Ramën shqiptarë – duke e larguar!
Me votë! Me guxim! Me vetëdije!
Sepse Shqipëria nuk ka më kohë për të pritur fundin e delirit të tij. Ajo ka nevojë për fillimin e lirisë së saj.